巴黎聖日耳門（PSG）中場安達靴里拉最近上西班牙電視訪談節目，揭秘尼馬喺今年二月廣邀隊友參加嘅白衣生日派對，話呢位巴西球星將隊友分為已婚同單身兩組，並為「單身組」安排喺會場內有夜店服務，全程有美女相伴。尼馬喺生日會上貼心咁將會場分成上下兩層，上層係有老婆同行向尼馬道賀嘅人；而下層就係「單身專區」，畀單身人士享受「美好時光」，好似去夜店一樣，有美女跳辣身舞同陪酒。上年夏天離開曼聯轉投PSG嘅靴里拉，當日都有同老婆一齊去尼馬生日會，自然被安排喺上層。佢話老婆唔畀佢落下層：「我老婆唔會畀我落去，連去廁所都唔得。」靴里拉仲大讚尼馬搞派對有一手。
