9月6日立法會選舉臨近，據聞政府將更換多名可能要負責DQ參選人嘅「刀手」。政府大前日宣佈由發展局首席助理秘書長黃展翹出任沙田民政事務專員，接替2018年曾經DQ兩名本土派新東參選人嘅陳婉雯後，任內表現俾民主派鬧爆嘅中西區民政事務專員黃何詠詩，噚日亦突然帶埋將會接替佢嘅新「刀手」，現身中西區區議會。
雖然政府至今未正式公佈，但中西區區議會副主席、民主黨楊浩然喺facebook透露，原任大學教育資助委員會副秘書長嘅梁子琪，將接替2016年1月上任嘅黃何詠詩出任該區民政事務專員，噚日更率先以候任中西區民政事務專員身份，現身該會嘅地區工程及設施管理委員會會議。
八方翻查資料，梁子琪2003年出任民政事務總署高級政務主任，2012年做過教育局助理秘書長（機構事務），2017年曾以大學教育資助委員會副秘書長身份，陪住時任教育局長吳得掂出席立法會嘅帳委會公開聆訊。