《蘋果日報》明日25歲生日，除咗特別製作25周年特刊《不是最終章》，記錄25年來走過嘅路，公司噚日舉行25周年聚餐，等大班同事聚首一堂同《蘋果》賀壽。
員工：蘋果要有125年
壹傳媒創辦人黎智英、集團行政總裁兼《蘋果》社長張劍虹、副社長陳沛敏、總編輯羅偉光同所有同事一齊慶祝，呢個場合梗要肥佬黎向同事講返兩句，佢話國安法殺到嚟，其實大家都唔知點做，𠵱家要靠大家做啦！佢又囑咐同事要對得住自己良心，「第時要靠你哋對自己嘅責任、對社會嘅責任、對家人嘅責任。」大家聽到呢度即大力鼓掌，佢又不忘多謝同事，話入得《蘋果》打工好大代價，好似唔返得大陸等，之後爆一句：「《蘋果日報》做到今日咁，都係你哋造成㗎！」全場當堂大笑，八方相信老闆都係想搞吓gag，心入面嗰句係：《蘋果》做到今時今日，都係靠一班員工。
八方之後同好多員工傾偈，大家都不約而同話，「希望《蘋果》捱過呢一關！」有人話希望加人工、希望282（壹傳媒）入藍籌，亦有人話入職冇耐，希望過到試用期。更加有人好激動咁話：「要繼續鬧爆林鄭！」「蘋果要有125年呀！」
李八方