意大利盃周三上演祖雲達斯對拿玻里嘅決賽戲碼，雙方法定時間下互無紀錄，結果拿玻里憑互射12碼以4:2奪冠。老婦人球星基斯坦奴朗拿度（C朗）職業生涯仲首次連續兩場球會級決賽輸波，相當冇面。
今場比賽喺羅馬奧林匹高球場閉門上演，開賽五分鐘C朗就有一次黃金機會，接應隊友保羅戴巴拿嘅左路橫傳禁區內射遠柱，可惜角度太正俾對方門將橫身撲出。拿玻里站穩陣腳之後開始反擊，23分鐘恩斯治尼離門30碼主射罰球，可惜中柱彈出。完半場前拿玻里再有兩次埋門機會，不過都俾祖記嘅保方先後化解，雙方半場互交白卷。
可能經過兩個月嘅停賽，雙方球員嘅狀態同體力仲未回復，換邊後兩軍雖然互有攻守，不過真正有威脅嘅埋門就唔多，下半場唯一驚險鏡頭出現喺補時階段，拿玻里後衞馬克斯莫域接應左路角球頭槌攻門，保方擋出唔遠，門前一輪混戰下艾利夫艾馬斯快腳一射又中柱彈出，結果雙方法定時間內互無紀錄，直接進入互射12碼階段。
戴巴拿射失12碼
為祖記主射第一輪嘅戴巴拿俾今場代替奧斯賓拿把關嘅阿歷斯美列特撲出，跟住第二輪主射嘅丹尼路雷斯又一腳射上看台，雖然邦路斯同艾朗藍斯之後都為祖記射入，不過拿玻里方面就四輪全入，結果以4:2贏出，而原本為祖雲達斯主射第五輪嘅C朗就冇份出場喇。
沙利繼續冇盃捧
今次係拿玻里球會史上第六次贏得意大利盃，亦都係教練加度素執教生涯嘅首個錦標。不過另一邊廂，祖雲達斯教練沙利就相當唔好彩喇，今場唔單止輸咗畀舊東家，原來佢執教咗30年都從未贏過意大利國內嘅頂級錦標，唯一嘅國內冠軍已經要數到02/03球季執教意丁球隊桑索維諾嗰陣贏過嘅丁組聯賽盃喇。
除咗沙利之外，相信祖雲達斯嘅當家球星C朗都同樣唔多高興，事關今次係繼上年12月輸咗畀拉素嘅意大利超級盃之後，連續第二次喺決賽輸波，係佢18年職業生涯以嚟首次連續2次喺球會級決賽落敗，而佢亦都超過一年冇捧過盃喇，加上歐聯首回合又落後畀里昂、聯賽又領先得第2嘅拉素1分，C朗今季隨時要食白果呀！