自雷曼風波後，金管局對銀行之綜合戶口（即存款、投資、外幣存款之綜合戶口）管得好嚴，呢日左丁山收到一位RM電話：「左生，你嘅風險評估已經過咗兩年，唔該你得閒上嚟坐吓，順便做過風險評估。」呢啲乃係唔賺錢，花成本嘅「合規事務」，RM其實都討厭做，不過合規部睇到實，那敢不從。
於是吃過午飯就到銀行見RM，佢又請一位同事來問話、錄音，不過左丁山已經答慣，有問必答，有答必快速，五分鐘就搞掂。銀行評估左丁山之投資風險乃係平衡性，意料中事也，大家可以交差，皆大歡喜。RM問完，到左丁山問番RM：「呢排忙啲乜？」RM嘆曰：「做到死，大把人要開新加坡戶口，簡直應接不暇，目前還有幾百人排緊隊等我哋見，一宣佈有國安法之後，我哋嘅電話響個不停，比舊年7月還要多。我以為要搬錢走嘅人已經走晒啦，點知國安法刺激到大批客戶要開定離岸戶口。左生，又話有美國基金要衝擊聯繫匯率，怕唔怕㗎？」
1983年有聯繫匯率，呢位RM還未出世，97/98金融風暴時，還讀緊中學，對衝擊聯繫匯率冇感覺，一啲都唔奇。想當年（1983年10月上旬）左丁山任職商人銀行助理總經理，「炒房」日日告急，TT（港元兌美元）日日大跌，不少客戶唔夠孖展，要追到氣咳，左丁山創下一日七小時去一次洗手間嘅紀錄，而家諗番起，好似係神話故事。
左丁山自1983年10月17日有咗聯繫匯率制度之後，就相信香港唔會改變呢個制度，理由一係政治慣性，當年由經濟學家倡議，財政司問過唐寧街10號，英國又諮詢過北京意見，經戴卓爾夫人、鄧小平同意不反對先至確立，今天香港特首那敢輕舉妄動？以北京領導人之慣性，行之有效嘅制度，誰人敢負政治責任，拍板話港元可與美元脫鈎？習近平亦無此膽量。理由二係1997年金融風暴係地區性。對沖基金在泰國印尼賺大錢之後以為可以過三關，但遇到頑抗再加上LTCM破產，大鱷唯有撤退收兵。今年並無如此狀況，美國人巴斯（Kyle Bass）要集資募集資金嚟衝擊港元，聲言用200倍槓桿，即是刀仔鋸大樹啫，要砌香港金管局之4400億美元儲備，只係動用22億美元買期權？簡直難以置信。
巴斯只會有一個取勝條件，就係佢知道美國會有制裁香港/中國之辣招，由美國財政部宣佈，令香港金融市場大震動，巴斯或者猜測/預料美國會有大舉措對付港版國安法，而我矇查查唔知。睇牌面，巴斯輸九成九，但如有枱底理由，另作別論。