車路士喺周四官宣，球會已經同RB萊比錫達成協議，24歲前鋒迪姆華拿會喺下季加盟藍軍。華拿會喺德甲剩餘賽事結束之前繼續留喺萊比錫，直到七月先至正式加盟。車路士喺聲明中並冇提過轉會費，據英國《每日電訊報》報道，華拿嘅轉會費為4,750萬鎊（約4.6億港元），雙方簽約五年，華拿嘅周薪將高達17萬鎊。
之前有報道一直話華拿會加盟利物浦，不過紅軍最後搶輸畀車路士，直至禮拜四藍軍終於宣佈華拿加盟嘅消息。對於自己決定加盟藍軍，華拿喺接受藍軍官方訪問時就話：「好高興可以加盟車路士，加入呢間偉大嘅球會真係令我感到驕傲。當然我都要感謝RB萊比錫同埋佢哋嘅球迷，呢四年度過咗美好嘅時光，佢哋永遠喺我心中。我都好期待下季同新隊友、領隊合作，一齊擁有一個成功嘅未來。」萊比錫下場比賽會喺主場迎戰多蒙特，呢場德甲亞軍之爭，亦會係華拿嘅主場告別戰。
事實上紅軍退出華拿爭奪戰唔係冇原因㗎，事關領隊高普就講過冇理由球會一路蝕錢，叫球員減薪嘅同時，仲要畀幾千萬鎊去買人，咁做好難同班球員解釋，好可能就係因為呢個原因，令到紅軍簽入華拿嘅計劃最後完成唔到。