拜仁慕尼黑周二憑住羅拔利雲度夫斯基上半場一箭定江山，喺最後10人應戰下1:0小勝雲達不來梅，提前2輪完成德甲8連霸。自從德甲喺1963成立以嚟，拜仁喺57季入面竟然攞咗29季冠軍，仲多過其餘咁多隊夾埋，咁搞法德甲真係要叫「拜超」喇！
排喺積分榜尾二、仲要搶分護級嘅不來梅，今仗初段其實踢得唔錯，守到臨完上半場先俾羅拔利雲度夫斯基射入奠勝球。呢個亦係「羅拔仔」今季第31個德甲入球，除咗打破自己職業生涯單季聯賽入球紀錄，仲追平埋奧巴美揚喺16/17球季為多蒙特射入31個聯賽入球嘅德甲外援單季入球紀錄，認真威水。一班拜仁球員賽後齊齊換咗件紅色8號T恤慶祝8連霸，但羅拔仔就坦言觀眾席人影都冇個，感覺真係有啲怪。
拜仁自12/13球季起連贏8屆德甲冠軍，追平上季完成意甲八連霸嘅祖雲達斯，成為歐洲5大聯賽入面第2支造出呢個成就嘅球隊。其實喺德國一向玩晒嘅拜仁，已經攞過30屆德國頂級聯賽冠軍，而自從德甲喺1963年成立以嚟，佢哋喺57季入面就贏咗29季，即係超過一半，完全放甩晒各贏過五次嘅多蒙特同慕遜加柏，同埋做過4屆1哥嘅雲達不來梅。值得一提嘅係，阿拉巴同湯馬士梅拿今次都係第九度贏得德甲冠軍，追平咗列貝利上季創下嘅紀錄。另一方面，費歷克亦成為碧根鮑華同尼高高華之後，第三個先後以球員同教練身份協助拜仁贏得德甲錦標嘅人。呢位55歲主帥仲話明今季想做3冠王，帶隊贏埋德國盃同歐聯㖭。
柏達邦率先降班
另外，第二位的多蒙特雖然已經鎖定下季歐聯資格，但教練法夫利就承認球隊面臨星散危機，因為有傳曼聯、曼城同利物浦呢啲英超富豪球會已經吼實查頓辛祖，而阿舒拉夫就會喺借用期滿後返去皇家馬德里。
護級方面，柏達邦周二作客0:1輸咗畀柏林聯，成為今季首支篤定降班嘅球隊，下季要喺德乙再見。
