港台《頭條新聞》被迫停播、高層辭職、有線嘅六四報道又被指自我審查，香港嘅新聞自由空間係咪收窄？傳媒界風雨飄搖之際，now新聞部都有人事變動，主管新聞同財經資訊的首席副總裁張志剛將於今年8月底退休，接任人為係無綫新聞前中國組主管陳鐵彪，呢個調動喺業界內引起騷動。
電訊盈科媒體集團董事總經理李凱怡昨日向員工發電郵，交代人事安排，陳鐵彪下周二加入now新聞部並開始擔任其職位，而張志剛會出任高級顧問至8月底，以便交接。
無綫年代同譚衛兒合稱鴛鴦刀
咁究竟陳鐵彪係咩人？據李凱怡嘅電郵，「Bill（陳鐵彪）是資深傳媒人，於印刷媒體開展其記者的工作，並於亞洲電視及無綫電視的新聞部曾出任不同高級職位超過三十年。他在本地、中國及國際新聞有採訪及管理的經驗，在建立及營運新聞部亦有豐富的經驗。」
不過唔少傳媒界中人都知，陳鐵彪同中聯辦關係密切，佢喺無綫年代，同𠵱家《南華早報》總編輯譚衛兒合稱「鴛鴦刀」，兩個人同北京關係好好，不過陳鐵彪喺CCTVB際遇麻麻，佢曾任中國組主管，但早已冇沾手採訪工作，雖然佢係新聞部老臣子，但冇升過重要嘅位，近年主要工作係處理收視唔高嘅普通話新聞時段。
now新聞喺去年中大傳媒公信力評估中升為電子傳媒第一，公信力評分為所有媒體中最高，而陳鐵彪同西環關係密切，難免有人估佢係咪有「整頓」now新聞部任務？八方都問now新聞台所屬嘅電盈，陳鐵彪獲任原因及有乜重任？發言人回覆話，公司喺招聘過程會考慮不同因素，包括有關人士嘅新聞及傳播經驗、專業性、及帶領新聞團隊能力等方面，但就冇提到係唔係會整頓新聞部。
李八方