所謂「瘦田冇人耕，耕開有人爭」，民主派過去半年力谷「35+」，大部份功能界別都有人選出戰，唯獨體育、演藝、文化及出版界一直未有確實人選。過去幾星期，體演文出終於有潛在披甲人選，就係香港足球代表隊前隊長陳偉豪，而民主黨荃灣區議員兼前體育記者賴文輝及灣仔區議員李永財亦有意落場。
民主黨未定參選人
本來陳偉豪大戰盛傳代建制派出戰嘅港協暨奧委會副會長、全國政協委員霍啟剛，都幾有睇頭，但有消息指陳偉豪因為未準備好，所以今次唔會出戰。八方搵過陳偉豪，佢就話自己仲未有決定，仲要多啲時間，因為涉及比較多界別。其實唔少民主派有心人都有四出搵人選，好似有人搵過港超球隊香港飛馬前主席梁芷珊，不過佢同八方講冇興趣推咗。
咁係咪剩低賴文輝同李永財爭出線？未有答案前，民主黨噚日就出聲明，強調中委會至今未有支持任何黨員出選體演文出，若果此界別有競爭、民主黨又有黨員參選，一定會參與協調同初選。而賴文輝已經熱緊身，噚日一早同黨友到康文署請願，要求盡快重新開放球場，協助運動業界逐步回復正常。
李永財接受查詢時就同八方講，會唔會參選都係未知數，最遲今個月公佈。佢話今次考慮參選，係因為民主黨喺35+運用否決權上意志唔夠堅定，唔想該黨代表民主派出戰此界別，亦都唔想畀賴文輝自動出線。佢仲開出條件，話賴文輝若退出民主黨，佢會退出初選喎。
李八方