星二代加入娛樂圈，靠父母幫手機會多咗，而且又快打響知名度，絕對係一個優勢，不過同樣要承受好多壓力，話晒佢哋利用咗父母名氣，但如果到最後唔能夠青出於藍，就會俾人攞嚟唱衰。幾年前已經喺電影圈嶄露頭角嘅「小高」，近年喺幕後可謂大放異采，雖然唔算名成利就，但成績有目共睹，最重要係贏得同行嘅尊重同認受性，小高終於捱出頭，用表現證明自己實力。
Jessie最近同一班幕後食飯吹水，聽到原來小高啱啱出道時唔係一帆風順，曾經承受過某位前輩嘅氣焰，雖然佢老竇好多人畀面，但可能咁樣反而令小高被人睇唔起。
默默承受
話說好多年前，小高第一日開工就俾氣焰前輩「老李」篤住個鼻爆粗鬧，招呼未打第一句就係「快X啲」，小高被鬧嘅原因唔係因為佢做錯事，純粹只係有人倚老賣老睇佢唔起，開口埋口就話「我畀面你老竇咋」，總算小高有家教，只係默默承受，冇駁嘴亦冇怨言，又唔講其他人半句閒話，只係一切都俾在場嘅工作人員睇到晒。其實做人真係千祈唔好太短視，點知將來會唔會再合作，到時自己諗返起可能都覺得尷尬。
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
