除咗阿爺條水喉，唔少建制派政黨都係靠香港啲大孖沙泵水以維持運作。不過，疫情之下，百業蕭條，新民黨主席、行會成員葉劉淑儀做主席嘅海上絲綢之路協會（海絲會）同匯賢智庫都因為資源減少，要大舖搬細舖。葉劉都不諱言，因為資源「緊縮」，要由貴租嘅軒尼詩道搬去保良局旗下嘅物業，而高層人員仲要減薪三成，共度時艱。
借勢減下屬人工
葉劉發言嗰陣多次重申自己係非牟利機構，又話除咗職員減人工，佢自己仲要捐薪㖭。葉劉又話受疫情影響，錢少咗，內地嘅實習機會都少咗，只有中銀同中電可以為智庫提供暑期實習計劃。
雖則葉劉講到自己要捐薪咁慘，不過在場嘅其他人都大唱反調，海上絲綢之路協會聯席主席兼行會成員陳智思，仲有匯賢智庫理事會副主席史泰祖都話自己加咗人工畀下屬，而代表恒地李家傑出席嘅孫國林亦都話恒地冇減人工，要善待夥計，明寸葉劉？