一位小學老師已經復課，呢位老師A平時睇報紙只睇教育版新聞，娛樂版佢嫌太八卦，經濟版唔識，時事政治版太複雜，都唔睇，佢教嘅係英文科，咁多年來教書，都係想學生學好英文，升上英中。咁嘅純情老師，香港已很少，雖然不太理會社會事件，但作為老師，一心專注教學，教好本科，應受家長尊重。
上星期五，教師A出旺角，行經地鐵站出口外面報攤，撞到兩位小六學生站在報攤前面，於是問佢地做乜，學生話：「等大表姐嚟，佢帶我地去朗豪坊食嘢，Miss呀，乜嘢叫做斬斷黑手呀？」老師A為之色變，喝住：「唔准講咁粗暴語言。」學生話：「唔係噃，張報紙咁寫嘅！」教師A伸頭一望，只見報攤中有大公報頭版標題係大家「斬斷黑手，救救孩子」，文匯報頭版大字標題：「港澳辦：斬斷黑手，救救孩子」，小六學生眼力好，一早就睇到。學生問：「做乜救孩子要斬手？斬手指呀？」
教師A不知從何說起，好彩人地大表姐來到，教師A乘機拜拜，等佢地走咗，即刻買文匯大公返屋企睇清楚，研究點解救孩子要斬手。
教師A與左丁山親戚係教育學院（現教育大學）同學，與親戚互通WhatsApp，呻以後唔知點教學生，堂堂港澳辦，國家級機關，寫聲明惡氣騰騰，用啲字眼如：「其用心何其歹毒，其行為何其卑劣」，「教育管理部門和有關機構要把規矩用起來，斬斷伸向教育、伸向孩子的黑手。」，講教育喎，用咁粗暴，潑婦罵街語言，簡直係兒童不宜。
特區政府教育局局長楊潤雄聲言堅決支持港澳辦中聯辦之聲明，教育局會勇於承擔勇於作為，唔知係乜意思？即係點？以後要清算、開除非藍絲老師？學生在學校唔准唱「榮光」與「孤星淚」，只准高唱擁護基本法，意味以後老師一定要壓制學生言論自由，只准聽中聯辦港澳辦言論辦事，香港教育局實際上已跪低，對兩辦言聽計從，美其名曰行使教育管治權、加強國家安全教育，國情教育。內地微信早已有在香港奪回教育權、傳媒權之言論，睇嚟奪教育權係第一步。教育局根本控制全港學校，要管制，話咁易，撥款殺校任教育局講嘅啫，從基本做起第一步就係控制校長、教師升任校長前要讀校長培訓班，本來由大學承辦，以後可能會加入政治、一國兩制課程，由中聯辦派人講解；第二步就係加緊向教師少林寺教育大學施壓，向未來準教師加強培養「正確意識」，務求教育大學啲準老師思想純正，統一愛國口徑。校長張仁良唔知點頂得住壓力呢？校董會主席馬時亨最是挑通眼眉（故此經常時運亨通）能預知大事，早於四月前已宣佈不會續任三年，政府只好叫佢做到今年年底，明年上任之校董會主席除非係深藍，否則唔知點去推動教育大學內之「正確政治思想」教育，搵港台顧問委員會主席陳建強之類嘅人做教育大學校董會主席就怕啱晒嘴形嘞！