【黑鏡線索】
美國專家終於推算到，「中国死者數目超過官方數字十倍以上」。瘟疫初期，好多西方媒體同學者，都毫無戒心咁，引用中国官方數字。香港人晨早就知嗰啲唔可信，但外國人真心唔明，你見有啲武肺數據網站，到咗今時今日，仲用緊中国官方數字，將中国排喺疫情榜18名，咁滑稽。
外國人唔明，係因為佢哋當咗中国衞生部門，等同正常國家嘅相關部門，中国官方數字，等同正常國家嘅官方數字。外國人唔知咩叫毅進制，唔知中国數字，極其量只可以時間前後對比，絕唔能夠用嚟同其他比較。中国成日話自己国情有別，呢啲就係外國人唔明嘅国情。
相同字眼有盲點 三權唔分立
唔明係好正常。見你用同一字眼，條件反射，就會當然同自己世界嘅認知一樣。就算香港人，好多時都會跌入呢個盲點。佢話「法治」，你可能以為即係「法律約束當權者行為」，但其實原來係「依法治國」，即係「法律係當權者工具」。
例如「條約」，你以為即係有約束力，雙方莊重承諾，點知，原來佢意思係講吓啫，表達吓意見，just thinking out loud咁囉。所以你以為張約五十年先完，佢隨時可以話，其實嗰張只係一張「歷史文物」，參考吓好喇，唔使咁認真。
亦有如，佢講「自由」，係唔包佢唔想你有嘅自由。佢有「普選」，不過係伊朗嗰隻。佢有「民主」，但意思係「一黨代表人民專政」。佢有「三權」，唔代表三權制衡同分立。佢有班人着住西裝打晒呔坐喺大廳投票，唔代表係一個健全嘅議會制度。
點解同藍絲講嘢咁痛苦，因為對方就係乜都照字面解。「人哋外國都有國安法啦」，但當你同佢解釋，人哋嘅國安法條文同執行，同中国嗰套完全兩回事，咁佢就會葉劉上身：未試過又點知唔一樣？
同字異義估估吓 愛國即愛黨
面對「唔知係咪同字異義」嘅情況，一種處理，係by default先當所有嘢都一樣。但當你發覺，原來唔一樣嘅嘢，數量遠超一樣嘅嘢，合理做法，就係by default先當所有嘢唔一樣。
咁做會唔會有唔準確嘅時候？梗係會，所有捷徑都有唔準嘅時候，但日常生活唔係學術研究，「廉價七成準確」就夠用，剩低嗰三成寧枉莫縱慢慢修正，咁錯極有個譜。
香港人嘅痛苦，係以前最多係唔識国情，至少喺自己認識嘅香港，唔使成日估估吓。但今時今日，国情已經喺香港無孔不入，原來愛國即係愛黨，唱「榮光」係政治，唱「熱愛基本法」係美德。連喺自己地頭，都要by default當所有嘢同自己一貫認知唔一樣，香港變得好陌生。
外國人一向唔識国情，用自己嗰套理解中国嗰套，所以成日俾人攞着數。但一場武肺，推大家過咗某個臨界點，就會發現，係時候調返轉頭，乜都當你唔一樣，即係冇晒benefit of doubt、冇晒信任，於是忽然變成天下圍中，大勢已成，有排都唔會返番轉頭。
撰文：宋漢生
fb : sunghsblog