我要攬炒！舊年612暴政向香港人開槍，觸發連登巴打「我要攬炒」正式開火，向國際游說取消港共官員嘅外國護照，等佢哋世代共享大灣區榮耀。攬炒巴發動一波又一波行動，例如眾籌全球登報，成功將黑警濫暴、北京違反《中英聯合聲明》等問題，提升到國際層次。最近攬炒巴又有好消息，就係攬炒團隊正式加入由多國議員組成嘅「對華政策跨國議會聯盟」，成為中央秘書其中一員！
IPAC成員來自各國政黨
「對華政策跨國議會聯盟」（IPAC）喺6月初成立，13個國家嘅議員團結起嚟，共同對抗中共對全球民主自由嘅威脅，成員暫時有106位，均來自各國不同政黨，唔少名字幾有份量，例如比利時前首相伏思達同英國保守黨前黨魁施志安。聯盟將會推動所屬國家政府，對中國採取更強硬而一致嘅方針。
攬炒團隊接受網媒「立場新聞」訪問講過，「只要有心存鬥志、希望，人人都係攬炒巴」，團隊唔係英雄，只係一個精神，佢哋喺IPAC網頁用「Fight for Freedom. Stand with Hong Kong」做頭像，貫徹呢種精神。八方喺度希望佢哋《重光香港計劃》早日達標。
李八方