合和太子爺胡文新舊愛、38歲的劉晨芝於前日凌晨在中環夜店消遣時，被鄰枱的外籍女子起飛腳踢爆下巴，出現兩處傷口，友人代叫救護車把她送往瑪麗醫院急症室，其後轉往養和，兩個傷口共縫了10針，她在瑪麗醫院報警，並表示已聘律師追究到底。
「擔心破相毀容」
劉晨芝休息了一天，下巴傷口疼痛，頸部不能扭動，她展示多張傷口相，還有玷血的紅裙及胸圍照片。劉晨芝昨日電話親述遇襲過程，猶有餘悸：「當晚我同七、八個朋友去玩，隔籬枱見到一個識嘅男仔，就過去寒暄，我哋絕冇任何親密行為，但佢個外籍女朋友突然向我起腳，踢咗我三下，我下巴傷口立即湧出血嚟，朋友幫我按住傷口止血，我全程冇暈亦冇撞到嘢，去到瑪麗報警落口供，跟住轉去養和縫針。下巴傷口好痛，條頸轉唔到，我驚傷及頸椎。」
劉晨芝稍後會飛美國參與大導演馬田史高西斯（Martin Scorsese）監製的電影，她擔心會影響工作：「我個口都擘唔大，食唔到嘢，好擔心會破相同毀容，女仔做幕前個樣好緊要。𠵱家口擘唔大，點唱歌喎。」劉晨芝指事發時完全沒爭執，不明對方何以發難，劉晨芝謂那個打招呼的男友事後有聯絡她致歉，也有代女友道歉，但劉晨芝怒氣未消，她說：「我一定追究到底同要佢賠償，我受傷後好驚，精神壓力好大，一定要告到底，我好多證人，又有店中CCTV。」
莊思敏勸減夜蒲
《蘋果》收到風指女方是太陽娛樂老闆「洗米華」周焯華舊愛Mandy Lieu的師妹May Atkinson，女方的Ig都貼出很多性感相，劉晨芝從相片確認她是施襲者。好友莊思敏和陳庭欣都曾勸劉晨芝少去夜場消遣，她說：「我有開酒餐廳，我去都係應酬，工作一部份，不過呢次教訓，以後盡量減少啲應酬。」莊思敏回覆時指：「打人嘅女仔應受懲罰，希望劉晨芝快啲好返，佢喊咗成晚。」
其實劉晨芝蒲吧出事已非首次，2014年適逢韓國女子組合4MINUTE來港開騷，組合完成演出後與劉晨芝落蘭桂坊狂歡，飲大兩杯凌晨離開時，工作人員為擋鏡頭與記者發生衝突，混亂間工作人員受傷見血。
採訪︰陳杰
