英超仲有兩日就正式回歸！不過就喺呢個關鍵時刻，再有英超球員證實確診武漢肺炎，事關賽會上個禮拜六公佈英超第八輪病毒測試結果，1,200個檢測樣本中有2人呈陽性反應，之後榜尾嘅「金絲雀」諾域治就話佢哋有一名球員中招，搞到上禮拜五先同佢哋踢完友賽嘅熱刺人心惶惶，就連之後嗰日對雷丁嘅友賽都急急取消。打亂晒部署又怕有球員因為咁中招，隨時踢唔到英超重開第一場主場對曼聯嘅大戰，領隊摩連奴呢次認真頭痕喇！
諾域治一人呈陽性
話說英超月初嘅第七輪檢測中，明明已經冇人確診，點知賽會上禮拜四同五最新嘅病毒測試，就有嚟自兩間唔同球會嘅人中招。英超包尾嘅諾域治，就喺官網發聲明確認其中一名中招者，仲要係佢哋其中一名球員，但為咗尊重私隱就冇開名。諾域治仲話中招嘅球員會自我隔離七日，然後再進行病毒檢測，回復陰性先可以重新操練，由於距離諾域治英超重開嘅第一場波得番五日，意味呢位球員肯定無緣嚟緊禮拜五凌晨主場鬥修咸頓嘅護級搶分大戰。
更令人擔心嘅可能係熱刺，事關佢哋喺上禮拜五先同諾域治踢完熱身賽，外界隨即擔心佢哋會有球員中招。不過熱刺立即發聲明話，佢哋最新一輪嘅檢測冇人確診，仲話確診嘅諾域治球員冇同熱刺嘅球員有密切接觸。據英國當局公佈嘅衞生指引，只要冇喺兩米距離內同患者接觸15分鐘或以上，都唔算係密切接觸，但病毒係咪要15分鐘咁耐先傳染到，暫時就冇人知喇！
難怪熱刺對完諾域治後，原定喺上禮拜六對英冠雷丁嘅友賽都即刻取消，唔知係熱刺怕怕定對手雷丁驚驚呢？但對熱刺嚟講肯定係打擊，事關喺英超停擺前，由摩連奴帶領嘅熱刺只係排第八，喺歐聯同英足盃又出咗局，梗係希望喺英超重開後快啲踢好波，可以衝上前四啦。
呢場熱身賽對完榜尾嘅諾域治都輸波後，摩佬原本希望用另一個陣容去鬥雷丁，希望重振士氣，𠵱家友賽取消，難怪摩佬受訪時話：「我本來想將球隊一分為二，喺禮拜六對雷丁派另一陣容上陣，但𠵱家冇可能喇！惟有之後喺訓練場，進行多啲戰術訓練啦！」
傳下季借用藍斯
其實又難怪摩佬咁愁，事關英超重開後熱刺第一場波就要對佢嘅前東家曼聯，熱刺𠵱家狀態咁曳又冇熱身賽踢，輸埋畀曼聯莫講話爭前四，隨時連來季歐霸資格都爭唔到！雖然近日有傳祖雲達斯為減輕財政壓力，願意將周薪高達40萬鎊（約390萬港元）嘅中場艾朗藍斯，下季借畀摩佬用，但如果冇歐聯踢我諗熱刺嘅孤寒班主利維都唔會有大收購囉。