2019年6月15日，係我屋企人、同香港、同好多人感到十分傷心嘅一天。
我哋從不同媒體都知道大家冇忘記我個仔，心情十分複雜。
過去一年，呢一年發生好多事，亦改變好多人，呢一年我哋屋企人過得唔容易，受到唔同嘅壓力，每一日我哋都嘗試找安穩、平靜嘅生活。
𠵱家總算安好，同埋接受杰仔嘅離開……但係我都……為香港、同所有香港人一樣，唔能夠擁有免於恐懼自由，感到悲痛悲哀。
杰仔離開，但我哋作為人父母，思念一啲都冇減退，同時為佢嘅崇高理念而自豪。
呢一年，每個香港人都應該同我哋過得唔容易，但呢個政權越嚟越腐敗。我相信好多香港人對呢個政權唔抱任何希望，我同屋企人見到好多年輕人喺呢一年裏面，同杰仔一樣抱住單純嘅理念走出嚟，但係不停受到打壓，甚至受傷、流血、犧牲。
我哋為人父母，睇住啲年輕人，感到好心痛同擔心，亦唔希望更多年輕人好似杰仔一樣，為呢個冇希望嘅政權而受傷。我哋同一年前一樣，希望年輕人好好保護自己，留住有用嘅身軀，行得更遠。
嚟緊一年會更加黑暗，唔可以再同佢硬碰，否則只會悲劇再重演。
黎明（前）係最黑暗嘅，但我哋相信以香港人嘅能耐，我哋會搵到出路，再難捱都堅持捱落去。
杰仔嘅離去，我哋仍然希望為佢取回一個公道。死者已矣，我哋家庭亦唔會完整。我哋只係希望十分簡單，希望知道杰仔當天有冇得到應有嘅協助，有冇遇到不公平、不公義、不為人知嘅冷待，正如呢一年警方冷待對我哋一樣。
我哋希望有個死因研訊要求，面對政權百般阻撓，我哋束手無策，但我哋唔會放棄，亦將事件交畀律師處理，由律師繼續爭取。
我哋想講好多嘢，但可以講說話嘅空間十分有限，我將呢件事全程交律師處理，任何問題，會交畀律師代我哋回答。
最後，好感謝香港年輕人為香港爭取民主、人權、自由、法治，而犧牲、而努力。
願榮光歸香港。願主保佑。