我都會自卑同自責
造人成功，一切計劃之內。陳明恩和舞蹈員老公鄭獻，結婚三年一直有生B打算。知道懷孕當刻，陳明恩既驚且喜，「心情好興奮又好驚，好緊張，因為第一次做媽媽，check到有BB好興奮，跟住就諗，我有乜唔食得、有啲乜唔做得呢？諗好多嘢！」
陳明恩視生B為人生挑戰，就如接了一個表演要準備十足，「點樣去學做一個媽媽，好似一個騷每一個挑戰，好似嗰時《老表3》，我要做（打）功夫，我完全未學過，變咗push我去學一啲新嘢，開咗一個眼界：我𠵱家要做媽媽，嘩，有好多嘢學，我期待呢一個過程！」
這段時間，的確可以讓陳明恩專心安胎，事關她和無綫的合約在今年2月已滿，合約完了同時也BB來了。在無綫13年，近年劇集演出少之又少，現正播出的《飛虎之雷霆極戰》雖說是其告別作，但佔戲不多，陳明恩自知「鬼妹仔」角色難以擔重戲。
「鬼妹仔機會未必好多，未必每個劇可以有空間寫落去，我見到一段時間冇乜機會，我都會有我嘅掙扎，我會諗係咪我做得好差呢？係咪自己唔夠好呢？我都會有我自卑同自責嘅moment，唔開心咗一陣，我又諗，不如諗下其他有啲乜路可以發揮，好過自己坐喺度唔開心囉！我又準備生BB，不如睇下第二度會唔會有機會啦，我覺得有啲嘢，你冇嘗試過你唔知，可能失敗，但起碼我試過囉！」
很多事情都是估不到下一步會如何發展。像陳明恩和王祖藍，是演藝學院的師兄妹，機緣巧合認識了，才鋪下一條路令王祖藍引薦她給《同事三分親》劇組，才再有之後《老表》的發生。「我哋唔同屆，我year 1，佢（王祖藍）就畢業！我係跳舞學校，佢係drama school，佢哋戲劇last year要修一啲堂，佢揀咗跳舞，佢哋會嚟上我哋year 1嘅堂，所以就同我一齊上跳舞堂，我哋一齊拉筋一齊跳舞，第一年就識咗祖藍；到咗祖藍拍緊《同事三分親》，佢哋搵緊個鬼妹又要識講中文，佢話，我識一個呀，咁就介紹咗我拍一集，嗰次係我第一次TVB拍劇嘅經歷！」
我同老公啲工作停晒
又正如陳明恩因為演了一套音樂劇《Annie小安妮》，才有機會令林憶蓮的朋友睇中她，從而引薦她給林憶蓮，在2007年成為她第一次當演唱會和音的機會。「我好緊張，因為我冇人哋咁快去睇譜，跟住成隊band坐低，好勁，成首歌差唔多完美咁彈咗。我覺得跟Angelita（和音李安琪）學到好多嘢，我要喺度多謝佢，因為佢我學識點樣做一個和音突然間變solo，同埋跟Anthony（倫永亮）成隊band個質素都好好，feel到好正！」
陳明恩在演藝學院跳舞學校主修音樂劇，唱歌跳舞一直是她最大興趣，「我由細到大都好鍾意音樂，到咗18歲我就好鍾意跳舞，但係做戲真係冇乜點做過㗎，中學階段好似做過一、兩次啫！我聽到音樂劇，又可以唱歌又可以跳舞，又有得做戲，三樣都學到，所以我就揀咗音樂劇囉！」
不過陳明恩的小學中學階段，卻是非一般的學生，她的父母安排她在家中接受遙距課程學習。陳明恩的父母分別為新西蘭和澳洲人，早年因傳道而移民香港，所以陳明恩和哥哥兩兄妹都在香港出生。「我報咗名喺澳洲一間學校，我係喺澳洲一間學校畢業，不過我只係去過一次嗰間學校啫，好搞笑間學校，全部嘢寄過嚟，跟住我就係喺屋企讀，考試又寄返番去！我其實幼稚園係讀香港學校，講廣東話，但係我媽咪覺得，你喺香港長大，你又學廣東話，又有香港朋友，好多香港嘅嘢都會識，但係澳洲嘅嘢，起碼你要讀澳洲嘅歷史、地理，要睇嗰邊嘅書，如果第時大個，去澳洲住都容易啲進入嗰個地方。所以為咗我哋可以有呢個機會，佢就決定不如遙距課程啦，用澳洲課程喺屋企教！」
不一樣的童年校園生活，陳明恩覺得有得必有失，「我覺得所有嘢都係一個選擇，即係個胃就得咁大啫，我究竟食朱古力蛋糕吖，定係食芝士蛋糕呢？我揀咗呢個，食完飽喇，我咪食唔到嗰個囉！我覺得兩樣都有佢嘅好，喺學校讀書個經歷係好特別，但喺屋企讀書，亦都有佢嘅好喎，所以我覺得，係咪miss咗？係嘅，係miss咗，但我又得到另一啲好嘅嘢！我覺得每一樣嘢都係咁，你揀咗做醫生，定係做律師，你揀咗嗰個，你就經歷嗰個囉，我會覺得兩個都好！」沒有與同學仔相伴的時光，但陳明恩說：「但係有隻狗啦、有隻貓啦、有兩隻雀，有哥哥，哈哈哈！」
陳明恩和家人感情很好，疫情最嚴重前，她們一家人難得返「鄉下」探親，令陳明恩的老公有更深體會，「啱啱疫情開始，我同老公啲工作停晒，爸爸就home office，我哋突然之間發現，幾時可以一家人去澳洲呢，突然間發現一家人都得閒喎，即刻book機票過去。過去探我阿姨，佢啱啱做完手術都需要有人去照顧下佢，timing perfect囉！我同我老公就去咗兩個禮拜，我第一次帶我老公去我鄉下，佢都話去完之後明白我一家人多啲！」
一凹一凸咁先至夾
2013年拍拖，2015年訂婚，2017年結婚，陳明恩和舞蹈員老公鄭獻，因為跳舞結緣，「我哋互補不足，有啲比較劇場啲嘅跳舞，我可以話畀佢聽係點，有啲commercial嘅嘢，佢又可以話畀我聽，你咁樣型啲喎，我哋可以有呢個交流囉！」更難得大家都是對方的初戀，「我自己都覺得好特別，係咪好少可？兩個都係初戀！」
演藝和無綫年代都冇人追嗎？「哈哈哈，都有嘅！我覺得結婚，要搵到一個可以同你一齊生活，一生喎，唔簡單囉！對我嚟講，信仰都係好緊要，跟住發現我哋有好多嘢都好配合，例如我個人成日都好緊張，同埋比較衝，我老公呢，佢比較淡定，佢會令到我個人冷靜啲，我覺得搵到一個性格上、思維上配合得到彼此又幫助到，唔簡單㗎！有好多好好嘅人呢個世界，但係一齊生活嘅關係係咪適合呢？又未必喎，唔代表人哋唔好，不過係我哋match到，一凹一凸唔同，我先至覺得係夾囉！」
不過match極，鬼妹與港仔都總有文化差異，「可能其中一樣係我屋企好鍾意傾偈，你返到屋企一入門口，喂，點呀，你今日點呀，跟住會傾好多偈，食飯又會傾好多偈，但係佢（老公）屋企唔係咁嘅文化，傾少啲講少啲，所以開頭佢喺呢方面唔係咁慣，佢話問我咁多嘢嘅，咁多嘢講嘅，哈哈哈！有時呢啲衝突位，我覺得幾特別！」
陳明恩嫁了一個港仔，她的哥哥則娶了一個㗎妹，「我覺得幾得意，我哥哥就同咗一個日本女仔結婚，佢喺日本住，我老公就係福建啦（鄉下），兩個文化非常之唔同。日本人係好有計劃，跟schedule跟planning，好早已經plan晒成年，但係我老公嗰邊呢，佢哋好多嘢好即時好即興，所以係好唔同嘅一啲文化。呢一方面，我都要習慣下佢哋，我自己屋企就比較中間啲，有plan亦都有即興，唔同文化喺一個家庭裏面，其實幾搞笑，好似我要去探我阿哥，就要早啲講定，講下有啲乜想做，要做乜嘢，要好早去諗定；如果我老公嗰邊呢，最好唔好咁早去講咁多嘢，太大壓力㗎會，要即興啲！」
相處像聯合國，陳明恩最愛的始終是香港，「始終呢度生活，經歷咗好多嘢，我啲朋友大部份都喺度，香港，你會有好多回憶，雖然澳洲我去過好多次，但係回憶少啲，香港就會好多囉！」
【後記】鬼妹與港女
自稱「奶黃包」，外白內黃的陳明恩，問她有甚麼最鬼妹仔和最港女的性格特質，她說平常在香港不會察覺的，但一去到澳洲，即刻現形。
「去到澳洲先至發現呢個好港女，就係一出太陽就擔遮，哈哈哈！狂搽太陽油，又着啲長袖唔好曬到咁黑，澳洲人唔會咁㗎，佢哋都會搽太陽油，但係佢哋會好鍾意曬。我就唔係，我要擔遮，啲澳洲人就會望住你，嘩，你係咪儍㗎，都冇落雨！佢哋有好多人落雨都唔擔遮㗎，香港人可能唔知呢樣嘢係好香港，但係去到就知喇！比較鬼妹仔係點呀？可能我都係好容易同人傾偈囉，比較熱情，呢個都係我比較外國啲！」
勾結陳明恩這個外國勢力，不用怕！
服裝提供：Blindbyjw
場地提供：Dan Ryan's Chicago Grill Festival Walk