股壇長毛David Webb自己宣佈患上前列腺癌，今後將把精神、時間放在抗癌方面，少寫網上文章及深入調查報道，消息傳開後，中環朋友無不神傷。這位英國人股票分析師／資產管理專家二十多年前來港後，打出名堂，在科網股熱浪暢旺時期（20年前），創辦webb-site.com，巧妙利用webbsite名稱，可稱一絕，迅速吸引眼球，然後他不停發表深入調查報告，揭發香港市場上古靈精怪的妖股的蠱惑「財技」，踢爆旁門左道的做市手法，確令人佩服他的觀察入微和福爾摩斯式的頭腦，當然更佩服他的勇氣，不畏懼合法和暗地裏的攻擊及打擊。一位大上市公司董事在宣佈業績後，被Webb挑出公司策略錯誤，導致業績欠佳，不高興之餘，還是對左丁山說：「呢個David，無論係憎佢恨佢，都要承認佢係香港一位頂級財務分析高手，好醒目，好叻。」
左丁山曾與Webb同時係一個委員會成員，每次開會都係佢發言最多，問問題最透徹，委員會秘書及主席怕咗佢。此君睇文件非常勤力，左丁山揭幾十頁文件搵資料睇，Webb已經將所有文件全部上載入手提電腦，可以一分鐘內搵出兩年前會議紀錄所載主席之言，質詢任何「前後不一」嘅事宜，令主席不能蒙混過關。
香港股票市場目前就係So So分析師多，如David Webb者只有一人。近年多咗一啲專業法定機構，不時踢到啲內地民企股翻艇，令人喝彩，但沽空機構專以「私利」為目的，「踢爆」主要為自己搵銀，而Webb偵破不良手法，好多時係為公眾，以佢之投資分析能力，買股賺錢不算意外，事實上，如果唔係佢投資搵到銀，能長期維持富裕生活，亦唔會咁瀟灑，鍾意寫乜就寫乜，不受財團左右。以佢嘅名氣、知識、分析能力，賣身畀財團容乜易吖，搵錢仲輕鬆好多㖭。Webb在香港「一國兩制」前途最不明朗，國際金融中心地位都可能動搖之時，竟然被診斷患上癌症，癌細胞沿脊骨散播，令左丁山心中打突，嘆一聲：「乜時間咁配合呀！」
既為Webb悲，亦為香港神傷，之不過以前患上前列腺癌或者冇得醫，現時未必無望，如前紐約市長朱利安里患上前列腺癌廿幾年，現時仍然活躍，係特朗普台前幕後嘅顧問。Webb只不過54歲，成班中環老友衷心希望佢抗癌成功，亦希望有青年才俊接棒，做阿Webb第二。國安法打到埋身，如財經界畀國安法嚇窒，不敢踢爆內企港企蠱惑，再出現不了一個David Webb，香港金融中心亦似染上癌症。