求驗客手記：C朗宴客失威　祖記闖意盃決賽

意大利足球停擺95日後喺上周五正式回歸，由祖雲達斯主場對AC米蘭嘅意大利盃四強次回合揭開復賽序幕，但就送上一場0:0嘅悶波，搞到球迷好似唔入場都冇咩損失。不過，呢場波一球都冇，基斯坦奴朗拿度（C朗）都要「打pat pat」，佢喺開賽15分鐘曾經主射12碼中柱唔入，錯過開齋機會。而米蘭喺伊巴謙莫域因傷缺陣之下，仲有列比錫因為用「穿心腿」踢丹尼路雷斯被逐踢少個，不過祖記最終都係把握唔到優勢入波，僅憑首回合1:1嘅作客入球優惠，率先殺入喺周中舉行嘅決賽。

教練沙利賽後冇怪C朗，只係話佢唔多夠運，而隊友邦路斯亦幫口，話無論幾偉大嘅球員都會12碼宴客。其實C朗對球隊嘅感染力咁大，唔只隊友感受到，連佢女友佐真娜都話喺疫情期間俾C朗嘅健身精神影響到，當男友係導師咁，因為C朗咁勤力，如果自己練得唔夠多就會好羞愧，但家陣已經好享受同C朗健身，練出最佳嘅身體線條。