曼聯為咗備戰英超重開，上禮拜五同英冠嘅西布朗踢咗兩場友賽，傷咗大半季嘅保羅普巴終於同一月加盟嘅波基斯費南迪斯（B費）合作，點知兩人首次合體嘅第一場波，紅魔鬼就以1:2輸咗，好彩喺第2場友賽曼聯就復仇成功贏3:1，睇嚟普巴同B費兩位中場仲要夾喎！
曼聯入前四蘇B袋千萬
曼聯原本喺上禮拜二同史篤城友賽，點知開波前因對方教練米高奧尼爾確診武漢肺炎而臨時取消；所以曼聯喺上禮拜五，就一口氣同西布朗踢2場90分鐘嘅友賽，領隊蘇斯克查派出兩隊去應戰，基本上全部紅魔球員都有份參與。對住西布朗嘅第一場，係普巴同B費兩個中場大腦首次合體，B費亦都憑12碼為球隊先開紀錄，不過之後就射失咗另一球12碼，球隊最後仲俾西布朗嘅馬菲菲臘斯同蘇賀利先後建功反勝，睇嚟紅魔兩位中場核心仲要多少少時間磨合，但同樣傷癒復出嘅拉舒福特睇嚟狀態幾好，多次成功個人突破，可惜就冇入波。第二場曼聯就憑安達斯彭利拿梅開二度同鍾達希嘅入球，贏番西布朗3:1，相信蘇B都收貨嘅。
曼聯目前落後第4位嘅車路士3分，有指只要蘇B帶到紅魔打入前四，拎到下季嘅歐聯資格，佢就可以額外袋多筆達100萬鎊（約972萬港元）嘅獎金，停擺前紅魔各項賽事11仗不敗，普巴福仔又傷癒，紅魔下季踢到歐聯嘅機會都咪話唔高。
復賽首戰對手熱刺都輸
而曼聯喺英超復賽第一場嘅對手熱刺，同日都喺主場同榜尾嘅諾域治踢咗場友賽，比賽以4節各30分鐘嘅形式進行，熱刺最終輸畀諾域治1:2。喺冇球迷支持之下，摩連奴帶領嘅熱刺表現大打折扣，所以擁有最先進兼多功能體育場館嘅熱刺，就下定決心做「白老鼠」，願意配合英超賽會，成為第一個測試畀球迷入場嘅場地。
另外，英超賽會官方上周五亦發聲明，指復季後嘅首輪賽事，所有球員都會着上印有為黑人抗爭發聲標語嘅波衫，波衫背後嘅名都會改成「Black Lives Matter（黑人的命也是命）」，希望大家繼續關注種族歧視嘅問題！