黃心穎去年驚爆偷食人夫許志安，最後與馬國明分手結束3年情。馬國明前日被踢爆暗撻湯洛雯兩個月，兩人昨日凌晨在Ig齊以獨角獸蹺實小馬公仔的相片認愛，截至昨晚8時，吸逾28萬網民like爆「明」火「靚湯」。馬國明昨日開工時全程笑容滿面，他透露跟女友已互見家長，更直認媽咪對靚湯滿意度「爆燈」。
黃心穎與許志安去年4月被《蘋果》踢爆偷食，全城轟動，最終馬國明與黃心穎分手結束3年戀情。現年46歲的馬國明回復單身後，早前曾與契妹唐詩詠傳擦出愛火，但原來他已暗撻現年33歲的湯洛雯兩個多月。馬國明前日被拍到在女方紅磡寓所歡聚4小時，之後更以情侶裝孖公仔出巡，事件曝光後，兩人昨日凌晨齊齊在Ig大方認愛。
嘴角含春
馬國明昨早離開太古城寓所，到停車場取車前往電視城開工，全程笑容滿面。記者上前恭喜他有新戀情，他笑笑口說：「多謝晒。」問到拍拖多久？可否透露更多？他笑着說：「冇回應啦，真係冇嘢講。」問到他日前開設Ig，是否想宣佈戀情？他即露出含春笑容說：「冇嘢講，多謝晒。」之後他便直駛座駕返電視城開工。
之後馬國明在電視城接受傳媒訪問，提到認愛相片的「獨角獸」與「小馬」狀甚甜蜜，他透露：「呢個佢（湯洛雯）整嘅，佢好鍾意獨角獸，小馬我諗大家都明，張相其實影咗好耐，我哋一早有共識，幾時俾人影到就幾時講，我哋都好隨緣。」兩人是否已拍拖一段時間？馬國明透露兩人在2016年合作完劇集後甚少聯絡，直至最近才再往來，他謂︰「傾吓傾吓好似幾啱傾，可以發展吓。無啦啦自己講好奇怪，好似做新聞咁，我哋有共識，所以都冇乜避忌，喺公司都已經成日食飯，大家都開緊工，係喺隔籬廠，如果心水清，都會奇怪點解我掉低我劇組嘅人，佢又掉低佢劇組嘅人，然後兩個人食飯，之前冇乜人問咪繼續囉，從來都冇避忌。」
馬國明又說：「我年紀都唔細，我從來唔會呃大家，睇吓幾時到嗰個位就會講。」馬國明更坦承已互見對方家長，透露媽咪很喜歡湯洛雯。湯洛雯父親湯鎮宗和太太昨日出席姪仔新店開張，他稱對馬國明印象很好，讚他為人有禮及踏實，又笑言唯一缺點是太低調。湯太則給馬國明100分，又踢爆他曾到家作客食飯，但表現有點「驚青」。
心穎祝福
馬國明認戀湯洛雯，網民大讚合襯，截至昨晚8時，兩人的認愛post已分別有逾14萬like，更有網民搞笑形容為「明」火「靚湯」，不少圈中人如高海寧、鍾嘉欣、陳敏之、蔡思貝、黃翠如、苟芸慧、呂慧儀及岑麗香等送上祝福，湯洛雯胞妹湯樂瑤也有留下「拍手」圖案，就連鍾楚紅亦有留言：「恭喜！」及送上三個心形圖案祝賀。不過，馬國明契妹唐詩詠卻未有任何表示，她昨日只在Ig Story談佛偈：「讓自己的心真正覺醒，就是成佛。」不過最後唐詩詠留言不滿被扭曲成為其他意思。馬國明舊愛黃心穎前晚回覆傳媒時表示：「我祝福佢身體健康、平安，佢私人嘅事留返畀佢私人。」
採訪、攝影：黃曉程、仇志德、唐琛悠