6.12，下午4時，金鐘紅棉路及夏慤道交界，「我冇任何動作，嗰時我護目鏡都冇戴。」楊子俊指着影片中戴着黃色工程帽的自己，6.12被控暴動，去年10月「踢保」，今年初正式入稟兩案，包括「速龍小隊無展示警員編號」司法覆核及向警方索償人身傷害。一年前低調的女拔通識老師，本沒打算索償；現卻彷彿成了6.12警暴代言人，被惡意攻擊起底，被投訴「荼毒下一代」，他想用這「名氣」鼓勵同路人不要放棄，「我覺得法律程序都係一種抗爭，呢個運動冇一本教科書，冇人話畀你知點做先有用。」
去年自由之夏，楊Sir剛完成眼部手術，24小時要維持俯卧姿勢，保持眼壓助傷口復元。「爆眼少女嗰晚，我瞓喺度睇直播，我真係瞓唔着，又有市民因警暴受傷。嗰下我非常之內疚，我發覺我嘅個案唔單止關乎我自己。」「運動初期受害者受到嘅關注最多，律師係最好嘅，財政資源較多，如果我都唔去挺身而出，話畀警方知使用暴力係有後果，只會有更多市民受害。」8.11改變了他的人生軌迹，憤怒一下子爆發，「原來自己跟香港人一樣，已沒有退路。」當晚他立即聯絡負責自己個案的醫生和律師，希望可以幫助爆眼少女，自己立下決心要向警索償。
望教育界勇敢發言
提起僅剩2.5%視力的右眼，楊Sir出奇冷靜，現時他看東西模糊且有幻光，日常盡量雙眼並用，「保持住訓練對眼，令受傷嘅右眼唔會退化。最大分別係以前可以通宵改卷第二日返工，但𠵱家改一陣要唞唞，眼乾。」
他認為運動一年，自己對「香港人」感覺昇華，「大家目標一致，有共同訴求，係手足、同路人。」運動影響了他的前途，但他更擔心敢言的同工會逐一飯碗不保，未來「唔會局限自己在教學生涯上，希望教育界代表會將抗爭帶入議會，同意35+贏多啲議席。」