拜仁慕尼黑喺周三憑羅拔利雲度夫斯基射入奠勝球，主場2:1擊敗法蘭克福，連續三年打入德國盃決賽，將會喺7月4日同利華古遜喺柏林決戰，爭取第20次德盃封王。拜仁同法蘭克福今場亦有聲援美國黑人弗洛伊德（George Floyd）被殺事件，法蘭克福着上胸前印有「黑人生命同樣重要」嘅球衣，拜仁球員就着上印有反種族主義口號嘅T恤熱身，角球旗同部份場邊廣告板同樣印上相同標語。拜仁今場追平球會保持嘅歷史紀錄，今季43場各項賽事轟入129球，同球隊喺72/73球季所創嘅德甲球隊單季最多入波睇齊。唔計歐聯賽事，拜仁餘下仲有五場本土賽，破紀錄指日可待，預計拜仁破紀錄嘅第130球將會喺今周末主場對慕遜加柏一戰出現，可惜羅拔仔累積足夠黃牌要停賽，創造呢個神聖一刻嘅任務將交由其他人操刀。