王宗堯因高調支持反送中，早失內地巿場，本土發展亦不斷受壓，今年3月，他於港台劇集《獅子山下2020》主演的單元便被臨時抽起，演出的電影《夜香．鴛鴦．深水埗》上月也傳出遭阻撓上映。碰上武漢肺炎令娛樂圈大受打擊，他坦言收入縮水：「大家都好艱難，所有嘢環環相扣，當收入有影響，出街意欲會低，娛樂少咗、消費少咗、商家生意差咗，成個經濟都受影響。」
說實在，社運亦影響了王宗堯的人生觀和價值觀，「以往會覺得好多安排，香港人好實際，無論點追夢都會有計劃，但呢一年，對自己人生規劃少咗好多長遠打算，冇辦法為人生定一啲目標，以往我哋會想有一定收入、物業，甚至去旅行，𠵱家完全冇晒呢啲物質上嘅追求，價值觀亦改變，以往買嘢會睇嗰樣嘢價值、設計，本身係咪名牌，質料好唔好，興唔興，多唔多人鍾意，𠵱家去買嗰樣嘢會諗係咪值得支持，有冇更加大價值值得支持，係咪超乎享用價值，係咪幫到人？」
王宗堯跟如升斗巿民一樣，也要勒緊肚皮過日子：「我不嬲唔算大使，唔會特登去追求物質，應使則使，我食茶記、雲吞麵都開心，錢會用喺值得嘅嘢身上，支持黃色經濟圈。」
工作量不多的王宗堯，絕不後悔出錢助手足解困，「我覺得永遠只有做得唔夠，大家覺得大人應做幾多嘢，真正將自己個心擺呢件事上，就會覺自己做得唔夠。好多時講黃色經濟圈，點樣持續落去同經營先達到真正受益？唔係人血饅頭，好多人都濫用咗人嘅善心，去做投機商業行為，希望大家本住良心做嘢。」