阿仙奴喺下周英超重開首戰要作客曼城,球隊周三喺阿聯酋球場閉門友賽英冠嘅賓福特以作備戰,可惜槍手喺2度領先下都俾對手反勝3:2。賽前一眾阿仙奴球員一字排開單膝跪地,以示對美國黑人弗洛伊德(George Floyd)被殺事件關注,希望各界重視種族歧視問題。
大衛雷斯失誤累反敗
阿仙奴上周六已經同英冠護級分子查爾頓踢咗場友賽備戰,當時球隊就輕鬆以六球大勝,點知今場對住英冠爭緊升班嘅賓福特就意外輸波。賽前全體阿仙奴球員都着上印有唔同口號好似「黑人生命同樣重要」、「我無法呼吸」、「顏色不是罪行」等黑色T恤單膝跪地,以聲援美國黑人弗洛伊德被白人警察跪頸後死亡而引發嘅反警暴同反種族主義示威活動。今場阿仙奴嘅主力好似奧巴美揚、拿卡錫迪同尼高拉斯比比分別喺唔同時間落場,球隊上半場仲憑祖爾韋洛克禁區頂嘅入波領先1:0。
阿里笑「武肺源頭」要停賽
下半場賓福特把握阿仙奴守將大衛雷斯一次大意嘅控球失誤,由科蘇禁區內窄位抽入追平,之後拿卡錫迪12碼點轉身抽射幫槍手再度領先,睇嚟呢位法國前鋒嘅狀態都保持得唔錯,但球隊後防就唔太穩陣,喺比賽尾段防守鬆散,俾對手嘅戴域蘇古同辛頓巴迪斯迪先後破網,助賓福特尾段反勝3:2。目前阿仙奴排英超第九位,下星期第一場就要作客強隊曼城,睇嚟領隊阿迪達呢個星期都要處理吓球隊嘅防守問題喇。
英超已經落實喺6月17日重啟,第1日嘅2場比賽除咗有曼城對阿仙奴,仲有阿士東維拉對錫菲聯。英超賽會周三亦公佈咗新一輪武漢肺炎病毒檢測結果,1,213名職球員喺今個星期一、二接受病毒檢測,結果發現只有一宗確診個案。不過熱刺球星迪利阿里,因二月初喺機場拍片笑一名中國人係病毒源頭,結果禮拜四落實俾英足總罰佢停賽1場同罰款50,000鎊,英超重開首戰鬥曼聯唔使預佢喇!事後阿里就再次道歉:「如果有人因為我嘅行為感到冒犯,我再次道歉,呢個只係冇經思考嘅笑話。」