早排有班演藝界發起撐國安法聯署，但就俾網民發現聯署入面有已去世嘅人，又有唔係演藝界嘅人，之後仲鬧出包括蔣志光在內嘅藝人「被聯署」醜聞，不過到今時今日都冇演藝界組織或有關發起人出嚟，畀個正正式式交代。
話自己創作全部正能量
咁啱聯署發起人之一嘅鍾鎮濤，噚日同鄺美雲出席活動嗰陣，佢作為發起人，八方以為正常點都有個交代啩！點知佢嘅答案竟然係：唔清楚！真係典型藍絲嘅態度，有好處有威就爭住認，有鑊出事就立即唔關佢事！
話說噚日一班「香港再出發」成員，包括聯署支持成立港版國安法發起人之一嘅「撐警大使」鍾鎮濤，出席喺中環舉行嘅「促消費撐經濟」活動，佢之前就同鄺美雲、譚詠麟及成龍等早前份聯署聲明支持港版國安法，但就鬧出有藝人「被聯署」，仲搞到好多藝人要澄清，鍾鎮濤作為發起人之一，梗係問佢點解會咁，點知鍾鎮濤一貫藍絲口吻答：「我唔清楚！」吓！唔清楚？咁點做發起人？
不過鍾鎮濤就對表忠好清楚，係咁話自己係支持國安法嘅，要有穩定嘅社會先得，又猛話港版國安法對創作同言論自由冇影響，仲反問人想唱啲乜？想寫啲乜？佢話自己啲創作全部都係正能量，完全唔擔心。不過，正如好多市民擔心，睇大陸歷史都知，今日係正能量創作，日後政治風向一變就立即被批鬥，睇文革幾多愛國演藝人被打倒就知，唔知呢段歷史鍾鎮濤又清唔清楚？
李八方