經過近三個月嘅等待，英超下個禮拜就正式復賽，各支球隊都密鑼緊鼓積極備戰。除咗隊內嘅對抗賽，最好當然搵吓其他球隊拍跳，紅魔鬼曼聯原定周二就喺卡靈頓訓練基地同英冠嘅史篤城友賽，點知史篤城領隊米高奧尼爾被通知確診武漢肺炎，搞到呢場波喺開波前一刻先至取消，亦令呢兩隊波家陣人心惶惶，好擔心會俾病毒感染。
驗咗六次先呈陽性
因為武漢肺炎疫情肆虐，英超被迫由三月中開始停擺至今，當中經歷多次會議同埋英國政府都開綠燈，終於決定喺6月17號重啟聯賽，而曼聯嘅首場比賽就喺6月19號作客熱刺。曼聯近期已經積極為復賽練兵，之前亦有報道隊內嘅11人對抗賽，中場保羅普巴都有份踢，令球迷更期待球隊復賽之後嘅表現。
周二紅魔本身就約咗英冠嘅史篤城喺卡靈頓訓練基地友賽，據報道指史篤城喺開波之前收到禮拜一嘅病毒檢測結果，發現領隊米高奧尼爾確診武肺。之後就發生好似當日NBA爵士對雷霆咁嘅情況，就係兩隊已經準備好開波但都要即時叫停，最後當然要腰斬呢場友賽啦。
雙方球員好彩未有接觸
事後史篤城就發表官方聲明，證實領隊米高奧尼爾喺最新一輪嘅檢測結果呈陽性，其實佢之前五輪嘅檢測結果都係陰性，呢段時間佢會遵守防疫指引自我隔離一段時間，球隊事務暫時由助教麥堅尼負責。相關報道亦指出史篤城全隊上下喺開波前，都冇同曼聯嘅球員有任何接觸。曼聯喺送走史篤城之後，就自己隊內分隊踢11人對抗賽，今個禮拜五紅魔會同另一支英冠球隊西布朗友賽。
今次事件對即將重燃戰火嘅英超同英冠無疑係一記打擊，始終復唔復賽嘅最大爭議就係到底一籃子嘅防疫措施，能唔能夠防止到職球員中招。今次呢單嘢證實咗依然冇法完全阻隔疫症嘅傳播，或多或少會令復賽後嘅英超同英冠蒙上陰影。
至於英甲同英乙嘅賽事，禮拜二各支球隊再次坐埋開會，最終投票決定即時完結球季。不過，開會後大家都同意保持升降班制度同升班附加賽，仲用場均得分嘅形式計算排名。總括嚟講，英甲就由高雲地利封王，第8嘅韋甘比升上第3名可以出戰附加賽；英乙第二位嘅史雲頓場均得分較高，成為今季英乙冠軍。