另一名從外地回流，前年入行的女大狀Faith（化名）因運動而改變事業路向，決心留守香港。她坦言，處理示威案時經常要在自我與專業之間掙扎，明知作為律師須尊重法庭裁決，但始終無法面對抗爭者在自己手中送去牢房。壓力太大，經常發噩夢及失眠，令她要尋求心理輔導。
掙扎應否勸被告認罪
「身邊人叫我唔好咁上心，但唔上心不如唔好做？」香港出生但在外國長大的Faith，自小志願便是做大狀，修讀法律時正值雨傘運動，驚嘆香港人的團結，感受到社會不公，因此更堅定想入行。反修例運動令她進一步「撻着咗團火」，原本她打算專攻民事及商業糾紛案，改為希望處理更多人權案。Faith這個化名，是她向記者提議。
她至今處理逾40宗示威案，自言「精神分裂」有兩個自己，真實的自己自覺無力，感到「好辛苦好難過」；律師的自己則要恪守專業，不可在客人面前流露擔憂，要冷靜審視證據，並尊重法治精神，被告罪成便理應受罰。但每當她想到手上的暴動案被告一旦罪成、動輒面對幾年牢獄時，她便「頂唔順」。
Faith內心一直掙扎，若勸被告認罪，刑期可獲扣減三分一，暴動罪一般以六年為量刑起點，「出到嚟可能都未夠30歲，但如果博鋪大細輸咗，刑期係雙倍。」她認為因上一代太安逸，才令這一代飽受苦難，「佢哋覺得讀完大學都冇用，根源係睇唔到將來......佢哋有時會話『律師你唔明㗎啦，你係成功人士』。但其實只要有同理心就會明。佢哋都係被誤解嘅人。」
她認為即使法律層面上示威者是犯法，但背後煽動的是政府。「啲後生唔係為反而反，如果政府當初肯真心聆聽，佢哋嘅行動就唔會升級，7.21同8.31係好大轉捩點。」每次到警署處理保釋，見到一班在外邊等候的父母，「悲慘嘅現實係，佢哋唔係問控罪詳情，而係問傷成點……冇穿冇爛係奇蹟。」
提醒自己：入行唔係為名利
面對不公義的社會，以及內心交戰，Faith的壓力極大，卻不可向人傾訴，擔心發表意見會連累被告；鬱結成疾，經常發噩夢及失眠，需接受心理輔導，「需要有個地方喊吓，抒發吓情緒」。
這場運動令Faith決心留港，只要業界仍會為不公義發聲，便證明法治未死，只要緊守崗位，便是捍衞法治的最好方式。她時常會走到終審法院，凝望門外的公義女神像，「諗吓點解當初要入行，唔係為咗名利。好似好煽情咁，但需要一啲嘢提醒自己。」
訪問完結後，Faith傳來訊息：「可唔可以喺結尾幫我同讀者講一句heung gong yan ga yau（香港人加油）？」