法甲唔經唔覺因武肺疫情停擺咗三個幾月，法國職業足球聯賽賽會（LFP）喺4月底宣佈腰斬剩番10輪嘅球季，仲用場均得分嚟決定排名，排第七嘅里昂因為冇份踢歐洲賽，就連同兩支要降班嘅艾米恩斯同埋圖盧茲（白衫）上訴，希望可以踢晒今季。不過，法國最高行政法院駁回呢次上訴，確認賽會嘅排名方法有效。峯迴路轉嘅係，法院以理據不足叫停咗艾米恩斯同圖盧茲嘅降班裁決。判詞指目前LFP同法國足協（FFF）限制法甲最多20隊嘅協議將喺6月30日到期，之後要簽訂新嘅協議，所以下令LFP同FFF喺6月30日前重新考慮20/21球季嘅安排，仲表示下季法甲有可能有22支球隊角逐。