明報「專訪」警務處副處長蕭澤頤，讓他發表洗白警隊的偉論，用心良苦。昨天我扮演記者，提出幾條問題，但蕭蛇最為人津津樂道的soundbite，我尚未跟進。蕭蛇在結尾釋出「善意」，寄語年輕人：「你要改變當前情况，你要用一個守法方法去改變。假設你真係覺得警察唔好，你咪努力將來加入警隊去嘗試改變你覺得唔好嘅嘢囉，係咪？」
假如我是記者，就會一邊點頭一邊追問：「蕭蛇你講得真係啱！但好多市民畀警隊零分，正正覺得香港警察知法犯法，例如警察用膝頭跪市民條頸啦、用槍射爆記者隻眼啦、大庭廣眾扑濕市民個頭啦、特登推跌老弱婦孺啦、去便利店後數啦，諸如此類，蕭蛇你認為係咪守法呢？如果係，咁我以後都後數嘞，麻煩叫啲伙記咪拉我喎，得唔得先？」此時蕭蛇應該勃然變色，如果現場攝記夠專業，就會馬上拍照捕捉這一秒鐘的神態。
至於蕭蛇最後一句話，更成眾矢之的，被網民冷嘲熱諷：「如果覺得間餐廳唔好食，係咪入佢廚房自己煮呀？」或者說：「如果覺得黑社會唔好，係咪加入黑社會改變佢呀？」這種反應合情合理，可惜沒對準紅心。什麼是紅心呢？明報記者難得問了一道問題：「是否願意接受曾參與反修例示威的年輕人考警察？」蕭澤頤稱，要看他們是否有案底。這就是紅心。
假如我是記者，就會微笑着追問：「請問蕭蛇兩條問題。一、你覺得𠵱家嘅警察好唔好？」他沒理由說不好。我接着問：「你覺得警察好，年輕人就覺得警察唔好，咁佢哋加入警隊，令你哋改變，豈不是令警隊變成你眼中嘅『唔好』？你覺唔覺自己講嘢矛盾，同埋好假？」此時蕭蛇應該目露凶光，如果現場的攝記夠專業，也會馬上拍照捕捉這一秒鐘的神態。
不過咁係嚇我唔到嘅，因為我是一個專業的記者。我會繼續問：「蕭蛇，我仲有一條問題。聽講舊年好多學警雖然冇案底，但都因為政治取態而畀人踢出警校，後生仔唔妥你，真係可以加入你咩？」
如果有成千上萬年輕人聽了蕭蛇的話，馬上投考警察，我很有興趣看看會發生什麼事。