大國崛起，中國人只要出手，財大氣粗程度足以震驚國際，最近中國人就有一件「善舉」隨時令舉世譁然！中國人口福利基金會上月中響應世衞號召，喺大陸聯合發起「COVID-19團結應對基金·中國行動」大型公益籌款項目，等世衞可以同聯合國兒童基金會等一堆國際組織幫各國抗疫。中國對世衞咁大影響力，仲有14億國民喺背後，大家當然對佢哋寄以厚望啦，點知網民發現大陸民眾對眾籌反應好冷淡囉，發現由上個月18日起到噚日都只係籌得三萬人仔。
20個平台僅籌84萬
八方明查暗訪過呢次眾籌實況，先要還活動一個公道，因為實際籌到金額其實係有84.8萬人民幣，來自11.3萬人次嘅善長，計返人均捐助金額7.5人仔，應該係示範緊咩叫積少成多聚沙成塔嘅道理，其中支付寶公益同騰訊公益，仲分別帶嚟28.9萬同14.3萬人民幣善款。
咁點解又會被網民發現只籌到三萬蚊？原來呢次眾籌係同20個網絡平台一齊合作，但人多唔一定好辦事，點估到新浪微公益呢個平台成績原來咁失色！不過，佢表現唔算差，有啲名不經傳平台至今只籌到986.4元同1,006.4元。就算出名嘅平台好似百度公益同蘇寧公益，前者想籌300萬，結果得17人次共捐出143.05蚊；後者仲可憐，35個人次夾埋只捐出1.15元，似乎五毛黨連籌款平台都唔放過。
李八方