今年二月歐洲足協（UEFA）指曼城因為違犯咗財政公平原則（FFP），決定以禁戰歐洲賽2年同埋罰款2,490萬鎊（約25億港元）嚟罰呢支英超班霸。之後曼城嘅管理層一早講咗會向國際體育仲裁法庭（CAS）提出上訴。而相關嘅聽證會就喺啱啱過去嘅周一，喺瑞士洛桑嘅國際體育法庭開始，據知曼城聘用咗幫過梁頌恆上訴嘅英國皇室御用大狀，挑戰UEFA嘅裁決。
事緣曼城被足球解密網站發現喺2012至16年間誇大伊蒂哈德航空嘅贊助收入，涉嫌以左手交右手嘅方式「灌水」6,750萬歐元，最後UEFA決定重罰曼城。罰款事小，冇得踢歐洲賽兩年就認真大件事！前日開始CAS正式就曼城上訴召開為期三日嘅聽證會。據指今次曼城聘請咗我哋香港人非常熟識嘅英國御用大狀彭力克勳爵迎戰，我哋嘅前立法會議員梁頌恆曾經就宣誓案嘅終極上訴，搵咗彭力克爵士嚟香港做佢嘅代表律師。作為公法專家嘅彭力克，今次據指亦會對準FFP嘅法理基礎發炮。外媒話呢次曼城同UEFA嘅一戰，裁決嘅結果可能完全改變歐洲球會嘅發展，更關乎各地投資者嘅利益，對足球嘅影響唔差過1995年嘅「波士文裁決」，而聽證會過後嘅結果預料會喺七月公佈。