近星期股市急速反彈，成交暢旺，恒生指數已完全收復「五窮」，六絕消失大有希望，股市上星期出現一個奇景，就是炒「地攤經濟概念」股。據講內地有柳州「五菱汽車」，出咗一款「地攤神車」，有咗地攤經濟概念之後，一日賣出三百部，貨車售價五萬六千八百元，於是香港上市嘅五菱汽車（305）股價升到飛起，誰不知305並非「神車」生產商，股民捉錯用神，所謂地攤神車嘅生產商實際係上汽集團，美國通用汽車與柳州五菱汽車呢三間公司擁有嘅合資企業。
中國經濟模式係國家指導，私人可以賺錢嘅國家資本主義。國家領導人出句聲，就可以炒作，今次李克強總理去山東視察，專訪煙台一個地攤區域，講咗一輪「地攤經濟」，小店經濟就是就業崗位的重要來源，是人間的煙火，和「高大上」一樣，是中國的生機所在，此言一出，各省市立即識做，以前專門掃蕩小販攤檔嘅城管，為咗完成政治任務，竟然主動搵番以前畀佢地踢走嘅小販個體戶，促請佢地復市擺檔，充分顯示中國製嘅「優越性」，領導人要你死就死，要你生就要敗部復活，全國一窩蜂，一擁而上，鬥快搞旺地攤。
講地攤經濟，名詞好聽，實際上就係叫人做無牌小販（或者即刻發牌），香港旺角花園街、中環利源東西街、深水埗鴨寮街，以前嘅大笪地，都係地攤經濟，其實只係一類低增值，勞動集約嘅經濟形式。若在先進經濟體系，已受淘汰，有之亦不過點綴品，如跳蚤市場，曼谷街頭到處都係攤販，是隆路曾號稱曼谷彌敦道，路上攤檔之密集，令人寸步難行，根本係城市落後之象徵，只不過仍有經濟價值，就係為教育程度不高之基層家庭可以搵到飯食。
李克強在人大會議後之經濟記者招待會上洩露「國家機密」，就係有六億人月入一千元人民幣，即年入一萬二千元，按美元計就係約1700美元，低得離譜，與國家統計數字之人均GDP近乎1萬美元相差太遠。從另一角度睇就係中國貧富極度懸殊，第一線城市人均收入超出農村農民收入近10倍，根本違背社會主義初心。唔講收入不均，由地攤經濟可以迅速為失業人口提供就業，恐怕李克強鼓吹地攤經濟嘅主要目的就係現時中國失業數字龐大，不能宣諸於口，又無其他辦法保就業（六保之第一保），唯有重回舊路，大大放寬人民上街做小販！呢個本來係中國經濟壞消息，但總理提出，官媒一致讚好之下，竟成為炒股好消息，左丁山難以睇好。