早前黃之鋒同網民用任天堂嘅「動物森友會」邀請玩家去自己個島玩嘅功能，宣傳反送中及揶揄中共，搞到北京出手禁咗動森，之後仲火燒連環船，北京連帶封埋PS4、Xbox One等家用遊戲機嘅連結境外網絡功能，搞到大陸玩家怨聲載道，最近之鋒又借遊戲機抽水撐抗爭，隨時又觸動北京神經。
「感謝sony手足發聲」
之鋒噚日喺fb出po，佢貼咗Sony於6.12發佈新一代家用遊戲機PS5宣傳，之後加句：「感謝sony手足發聲 勿忘612」同埋「五大訴求，缺一不可」的emoji，之鋒抽PS5水，網民梗係玩埋一份，有人估會唔會又觸動北京神經，禁PS5喺大陸賣？又有網民話，小粉紅會唔會罷買PS5？不過網民揶揄，小粉紅一向係「口裏說不身體卻很誠實」，到時咪一邊叫罷買，一邊嚟香港搶貨！