盛傳車路士喺呢個夏季轉會窗會向李斯特城提出收購芝維爾，有「車迷」喺twitter指佢哋嘅左閘馬高斯阿朗素，數據上勁過芝維爾：「當你哋討論芝維爾嗰陣，係咪唔記得咗阿朗素喺進攻帶來嘅貢獻。芝維爾雖然比阿朗素踢多14場正選，但如果喺90分鐘嘅平均效率嚟睇，喺創造機會、保持清白之身同成功搶截對手方面嘅數據，佢都唔及得阿朗素。」估唔到阿朗素都留意到呢條帖文，仲畀咗like㖭。其實阿朗素唔係好受領隊林柏特嘅重用，今季佢要同艾馬臣柏美尼爭正選左閘，喺英超只係錄得9次正選同埋2次後備，但佢都貢獻到4個入波兼2腳助攻，效率一流。