早陣子韓劇《愛的迫降》大熱，男女主角玄彬及孫藝珍因滑翔傘事故發展異地戀；29歲的前香港滑浪風帆奧運代表兼新晉教練梁灝雋（Andy），因一場疫情跟新婚的南韓太太Soobin分隔兩地足足四個半月，原本四月在南韓擺的喜酒也延期。Andy這場異地戀同樣曲折甜蜜，期望有個大團圓結局。
記者：徐嘉華
攝影：廖雁雄
部份圖片由受訪者提供
由以前不吃辣、不看韓劇、對韓國事物一竅不通的Andy，2014年仁川機場情緣，成就他人生兩件大事，一是亞運首奪牌，二是找到一生最愛，去年10月跟南韓女友Soobin完婚；這次疫情，不少人選擇留在家中追劇，Andy和太太分隔兩地前一起追的劇集正是《愛的迫降》。
疫情累分隔港韓兩地
訪問這天，太太仍滯留南韓，Andy一個人到赤柱一間茶餐廳午膳，他選了「韓醬燴雞」，問他為何選這一款，他說：「純粹menu入面呢個最啱胃口，以前我辛辣麵都食唔到，訓練咗六年，𠵱家食到譚仔中辣。」現在應該改口叫他做Andy教練，今年3月31日結束12年全職運動員生涯後，隨即上任當香港滑浪風帆青少年隊助教，訪問當天因疫情停止訓練，但這位風帆迷還是出海鑽研2024新奧運板種的iQFoil，希望再熟習一下這板種的技術，對教學也有益處。
一個人吃完午餐，隨即跟太太FaceTime，二人用韓語溝通，Andy說：「其實我只識講好少韓文，啱啱問佢幾時返香港、食咗飯未、忙唔忙；老婆有教我韓文，但每次教唔到五分鐘就放棄，用番普通話溝通。」誰想到二月初陪太太回南韓探親，一別就四個半月；Andy說：「我因為要做嘢，去咗幾日就返香港，嗰時香港疫情嚴重過南韓，都想太太留喺嗰邊，佢原定三月底返港，點知南韓爆咗新天地教會群組確診，三月中仲開始出入境管制。」兩人最擔心是Soobin婚後持有的「受養人簽證」，必須要在本月返港換領香港身份證。
記得12年倫敦奧運前曾訪問Andy，當時單身的他曾說夢中情人要像明星鍾嘉欣，外表出眾又斯斯文文的，八年過後，他已忘了這件事，只說：「其實以前冇諗過自己老婆會係外國人。」這段異國情緣始於14仁川亞運前，當時Andy和香港滑浪風帆隊在時任總教練艾培理帶領下，提早數個月到仁川備戰，當時港隊一般會從訓練基地到仁川機場用膳，全因那兒選擇多，有一天碰巧遇上剛在青島讀完普通話返韓的Soobin，二人用普通話溝通下即時交換電話，很快展開這段異國戀，更成就Andy滑浪風帆的一個高𥧌
比賽失利傾通宵回勇
Andy九歲開始參加滑浪風帆暑期班、08年在18歲會考後開始全職運動員生涯，是一眾大師兄陳敬然、何智豪及鄭國輝的小師弟，自言性格free style、對成績不強求，但憑對滑浪風帆的熱愛，成績斐然，曾奪世青冠軍、亞洲冠軍及東亞運冠軍，還成為12倫奧代表，就欠一面亞運獎牌，機會剛好降臨在14年仁川亞運，他好記得當時的心情：「我玩風帆十幾年，一定要有個交代畀自己，當時我已贏過亞洲冠軍，冇理由亞運攞唔到牌；以前玩奧運、世青，我都唔緊張，但呢次仁川亞運就好緊張。」多得Soobin一句窩心說話，令Andy如願以償。
14仁川亞運9月舉行，第一天比賽就出事，那天賽三場，Andy前2場順利拿了第1及第4，第三場臨衝線前，突然有個泰國女選手偏離航道，跟Andy碰撞了一下，女選手抗議被撞，Andy那場被DQ，亞運總共賽12場，只可扣除一場最差成績，Andy必選擇扣除DQ那一場，換句話說，他在餘下九場不能有失；出事當晚，身在首爾的Soobin打電話安慰Andy，他很記得當時女友這樣說：「冇所謂，無論你攞咩成績都咁叻。」男方如有神助，最後一場場追上去，最後奪得銀牌，令他的履歷多添一份光彩外，亦贏得美人歸。
兩小口去年10月在香港簽字結婚，齊穿韓服十分合襯，原定今年4月18號在南韓女家補擺喜酒，現因疫情延至何時也未知；問起Andy去年10月幾號結婚，他第一個反應竟是：「死喇！你突然問我，好似18號，呢段錄影要cut，老婆見到一定會罰我，好似27號，真係唔記得咗，我唔係細心嘅人，太太就好細心。」Andy雖然很free style，但亦入鄉隨俗，向女友求婚前，也先傳一個訊息給女方父母，獲得允許後才着手訂婚戒，亦細心地選了女友生日當天飛赴首爾求婚，他說：「我冇跪低求婚，佢到𠵱家仲埋怨緊我，哈哈。」
退休後想到南韓養老
10月將年屆30歲的Andy，用「幸運」形容自己，除了有個賢內助，滑浪風帆要拿的成績差不多都拿了、奧運也去過，三月底退役，四月就即時轉型做教練，薪金還要「疫」市上升，比運動員時要高；現時Andy訓練的十幾名青少年選手，年齡介乎15至19歲，正是衝24年巴黎奧運的主力，過去三年已鑽研Foil的Andy，希望協助他們在奧運加強競爭力。
不少香港人因近年局勢考慮移民，身為家中獨子的Andy坦言不排除日後到南韓「養老」：「始終我喺香港工作方便啲，可能我60歲退休後會考慮去南韓住，嗰邊地方大啲，養老唔錯，所以𠵱家更加要努力搵錢。」
《愛的迫降》男、女主角長期分隔兩地，玄彬在最後一集再見到孫藝珍時，說了句：「我很想你！」Andy希望太太盡快回港，重過二人世界，最後，也不忘用韓文越洋跟太太說句：「Bae Soobin salanghae！」（截稿前最新消息，梁太已買了機票，可望本周末返港）。
識韓妹最緊要主動
記：韓國女仔邊方面同香港女仔最唔同？
梁：我識嘅韓國女仔都比較有主見，好清楚知道自己想要嘅方向再去爭取，佢哋好怕執輸，所以唔會怕醜去為自己爭取最好嘅嘢。
記：香港男仔邊方面贏韓國男仔？
梁：香港男仔唔會太大男人，韓國仲係比較傳統，男主外女主內，大多數都好大男人主義，香港男仔較細心，亦肯遷就女方多啲。
記：有咩方法識到韓國女仔？
梁：其實香港都有好多韓國人，包括嚟香港旅行、工作或者定居，主動去認識對方係最易嘅方法，韓國女仔都幾open-minded，只要主動打招呼，可能有意外收穫。
記：韓國女仔鍾意喺香港邊度活動多？
梁：呢方面就唔多清楚，不過我老婆平時好鍾意去西營盤買韓國嘢食，相信嗰度會撞到唔少韓國女仔。
知多啲：結婚移民先考韓文
香港局勢持續不穩，加上中共強推「港版國安法」，令近日移民潮重現，以南韓為例，可以投資移民或結婚移民，以下是結婚移民南韓的部份條件：
一）經濟狀況證明：2人家庭年薪至少約11萬港元的收入，個人收入、股息收入、物業租金收入等都可一併計算
二）韓語能力證明：至少為TOPIK初階一級程度，內容包括可完成自我介紹、購物、點菜等日常生活的基礎會話，能掌握約800個常用詞彙、基本語法及造出簡單句子等
註：投資移民需投資約390萬港元以上的生意，並僱用五名以上的南韓國民