自從國安法消息一出，香港全城鬧得熱烘烘，傳聞不少港人爭相棄港元兌美金。我反而想在實際角度方面分享一點看法。
港幣是否一種穩陣貨幣？是！驚唔驚港幣眨值？驚！好似好矛盾咁，但事實上就係咁矛盾。作為一個以structure新興市場貨幣為產品出身嘅人，由泰幣、印尼盾、韓國圜、菲律賓披索、墨西哥披索、委內瑞拉bolivar、南菲Rand、蘇聯盧布以至波蘭Zloty等等，早在多年前都已經炒過晒，贏過亦輸過。這些貨幣和國家當年都有些共通點：美元外債高企、政府外滙儲備越來越少和信心危機。港幣本來無可能同這些貨幣作比較。因為香港沒有太大的外債，外滙儲備也龐大，雖然勢頭是日漸向下，問題慢慢會浮現，但暫時還不是問題。因此，港幣現時面對的是信心問題。
貨幣信心呢家嘢好麻煩，唔係你話有最優秀的金融團隊坐鎮就得。如果只有你講，人哋唔信都無用。到了今天的地步，香港人整個投資態度也是時候要改變了。當你八至九成身家都係港幣時，你剩番嘅一至兩成資產都重係要堅持揸港幣？
如果好多香港人會夠膽揸住一隻由2008年金融風暴前，150蚊一路跌到𠵱家35蚊，最近連股息都收唔到嘅港幣投資工具時，點解唔夠膽分散投資去一些派緊4至6厘息、在外國掛牌嘅美元ETFs組合？錢多啲的可能已經開了離岸銀行戶口，少啲錢也可以去出面的外國網上證券商開戶，投資可在網上進行。多有多做，少有少做，最怕唔做。分散風險，好悶好老土，唔係用嚟賺大錢，但可能可以保命。
遮打道口水佬
本欄逢周三刊出