最近「寵物哥」被爆四圍食女，惹起全城哄動，全世界鬧爆佢係世紀賤男，但仍然有好多無名波女出嚟話俾寵物哥追求過、撩上床等等，無他嘅，可以增加知名度之餘，無論好定壞，都可以掛上「緋聞女友」之名行走江湖，呢啲亦可以話係娛樂圈嘅潛規則，識玩，即使人唔紅，工作量唔多，都有自我生財嘅方法。寵物哥呢單嘢，亦令Jessie諗起當年「元祖姐姐」教後輩點樣上位嘅一句說話：「搵個紅嘅咬住唔放！」
元祖姐姐可以話係第一代嘅寫真𡃁模，喺娛樂圈打滾十幾年，依然保持住人氣，皆因佢有一位永遠可以掛喺口邊嘅緋聞男友「黑痣哥」。元祖姐姐靠黑痣哥呢條水，無論幾時拎出嚟講吓都會有人buy，尤其返內地啲偏遠地方，搵港星嚟登台，唔使識得你叫乜名，只要掛住「乜乜乜個ex」就大把人邀請出騷，呢招簡直係撒手鐧。
馬嘉泊錯碼頭
Jessie聽講元祖姐姐多年來搵埋唔少，又唔使做不道德交易，只靠緋聞都可以買樓置業，算係好叻女。而且元祖姐姐又冇將生財伎倆收收埋埋，有次喺活動遇見佢好姊妹「馬嘉」，元祖姐姐明醒幾招畀老友，叫佢唔好搵個二打六拍拖，即使要傳緋聞都要搵個紅啲，之後死纏住對方，工作量就自然多，話好過自己捱世界。而馬嘉都好積極進取，之後仲畀佢搭上咗一線小生「阿壽」。可惜阿壽喺香港知名度高，但係佢自己都未打開內地市場，馬嘉可以話係泊錯碼頭，最後都幫助唔到幾多。
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
