武漢肺炎疫情嚴重衝擊球壇，唔單止搞到今夏轉會窗時間大變，就連球員喺轉會市場上嘅身價亦受到影響！根據國際體育研究中心（CIES）禮拜一發表最新一期嘅球員身價排行榜，結果五大聯賽之中法國球星基利安麥巴比排榜首，第2至5位竟然全屬英格蘭球員，反而兩大球王美斯同基斯坦奴朗拿度（C朗）都跌出10大，其中C朗更已經跌到去第70位，認真慘慘豬！
由於武肺疫情令球壇停擺咗幾個月，今個夏天嘅轉會窗檔期都會有變動，其中意大利足總禮拜一就落實會喺9月1號先開窗，去到10月5號就關閉，仲話如果球季再度停擺，就會用季後賽方式或積分計算去決定今季成績；英格蘭足總亦考慮將今夏嘅轉會窗推遲到八月先開，同樣想去到10月先完，等各支英格蘭球會有多啲時間組軍。
21歲麥巴比身價榜居首
不過各大球會如果想買人，都可以參考吓CIES最新公佈嘅球員身價，話說CIES參考咗5大聯賽各個球員嘅8大要素，包括年齡、合約、球會表現、成長幅度、國際賽數據、聯賽水平、商業價值同市場環境嘅因素。由於受到武肺疫情影響，呢幾個月都冇乜波踢，唔少球星嘅身價都因為咁而大跌。
結果踢緊法甲巴黎聖日耳門嘅法國球星麥巴比，繼一月嘅統計之後繼續排榜首，無他嘅，麥巴比𠵱家先得21歲，就已經拎咗四次法甲冠軍、又係世界盃冠軍成員，相信未來球壇都係佢玩晒，但留意番佢現時身價係2.59億歐元，比起1月已經跌咗600萬歐元左右。但令人意外嘅係，排第2至第5位嘅竟然全部都係英格蘭人，依次係史達寧（1.95億歐元）、查頓辛祖（1.79億歐元）、阿歷山大阿諾特（1.71億歐元）同拉舒福特（1.52億歐元）。
拜仁艾方素升幅最勁
最令人驚喜嘅，要數到拜仁慕尼黑19歲新星艾方素戴維斯，呢位加拿大小將其實今季已坐穩球隊正選左閘，速度飛快又能攻善守嘅表現，成為德甲重開後最耀眼嘅新星，結果佢由1月時不入前100位，到家陣已憑1.34億歐元嘅身價打入前10。但更令人意外嘅係，目前地表上兩大球王美斯同C朗竟然跌出前10，其中1月時排第8嘅美斯，考慮到佢同巴塞隆拿嘅合約下年就到期，到家陣都仲未傾掂續約，身價已經跌到1億歐元排喺第22位；不過C朗比美斯仲尷尬，事關呢位已經35歲嘅葡萄牙球王，由1月時嘅第49位跌到落第70位，正所謂長江後浪推前浪，C朗可能就快會消失喺呢個球壇百大身價榜喇！