日本球星本田圭佑周日喺社交網站貼文，批評日本政府唔肯參與美英嘅聯合聲明譴責中國政府，但係隨住日本政府喺周一對「港版國安法」表示咗關注之後，本田喺周一再貼文向政府公開致歉。
本田喺周日嘅貼文入面引用咗共同社嘅報道，批評日本政府因為利益而唔肯譴責中國政府，仲話唔能夠接受日本喺冇任何理由嘅情況下「犧牲香港民主」。當時有網民留言提醒佢，就話共同社過去報道過唔少消息係唔正確嘅「假新聞」，本田亦表示如果嗰篇報道係不實嘅話，咁共同社就有「嚴重問題」。
事隔一日，日本首相安倍晉三喺周一嘅國會上公開表示，對中國向香港實施嘅「國安法」深切關注，仲促請中國維持香港原有嘅一國兩制。本田圭佑同日下午再啲twitter轉載有關嘅新聞，仲貼文致歉：「共同社噚日報道嘅係假新聞，佢哋至係有嚴重問題嘅一方。致政府嘅各位，非常抱歉。」唔少球迷都留咗言，對本田作為公眾人物敢於認錯嘅態度非常欣賞，亦有人表示安倍嘅發言其實唔表示日本加入譴責，共同社嘅報道又唔係完全失實。