反修例運動一周年，港人由力拒惡法變成全民抗暴，香港POPO亦由人民公僕變人民公敵，佢哋違規違法行為事隔一年只係更變本加厲，而佢哋喺抗爭者身上留低嘅傷痕，就「揚威」國際，因為由香港攝影師高仲明拍下嘅紀實照片集《Wounds of Hong Kong》，喺6.9呢日獲Sony舉辦嘅《世界攝影獎2020》專業組冠軍，不過即使奪冠，亦冇法避免作品重演「被下架」命運。
攝影師：再深究好無謂
講開呢個比賽，如果大家仲記得，今年2月宣佈入圍名單時爆出河蟹事件，《Wounds of Hong Kong》原先有10張作品參賽，結果只剩低4張唔見傷痕照片，大會解釋因照片對某啲人具「煽動性」喎。高仲明噚日就喺fb透露，賽果宣佈後，10幅作品一度齊齊整整喺大會網頁出現，但後來又打回原形被移走，不過再深究點解彈出彈入已經好無謂，同時慨嘆係咪傷痕被河蟹後，照片集就變得健康，而港人呢年受嘅創傷又係咪可以當冇發生？網媒「立場新聞」去信主辦方，問點解又將相下架？對方答覆如遊花園，又話發佈內容會考慮接觸面、注意受眾觀點責任，又話鼓勵透過得獎攝影師自己嘅渠道探索佢哋全套作品。
《Wounds of Hong Kong》原意係記錄警暴，高仲明指獲獎唔只係對佢個人嘅肯定，更重要係令國際輿論再次關注香港。佢早前成功眾籌出版相冊，預計今個月中印好，除咗已課金嘅人會收到，相冊仲會放黃店寄賣。
李八方