6月9日，對所有港人嚟講都係意義深遠嘅一日，除咗因百萬人上街，亦係抗爭運動開端。一年過去，全球俾武肺攻陷，北京趁全球分身不暇，全力喺香港推國安惡法。港人近排俾無力感包圍，不過好多手足仍默默抗爭。有連登巴打噚日上載一段高質抗爭動畫（圖），為手足們放上Twitter，仲好貼心咁整埋英文同普通話版。
三種語言 上載Twitter
條片全名係「香港國安法：對全球作出的最後呼喊」，影片製作手足喺連登貼文話：「希望用呢段抗爭動畫為香港喺咁困難嘅時間出一分力」。手足覺得各國反應可令反共陣營逐漸成形，仲希望可以幫手喺Twitter上轉發呼籲各國齊心反共，connect更多唔同國家嘅人對準中共政權。
條片真係十分高質，第一句就講中好多港人心聲，「2020，香港歷史上最黑暗的一年」，2019抗爭歲月好多令人揪心嘅畫面，一一再呈現眼前。畫面一轉，就係一個習大大身影伸出黑手爪向地球，「昨日新疆、今日香港，明日爪牙將蔓延至世界」，港人身影，就成為咗抗極權最前線，呼籲世界同港人線成一線。手足最後仲同大家講，呢個只係上集，希望有機會再出片。八方唯一挑剔嘅地方，就係點解得三種語言，各位繙譯師快啲幫吓手！