恒基地產（012）聯席主席李家傑前排去北京開兩會，疫情下冇跟班、凡事都要親力親為，點知一捲起衫袖搬行李，就唔小心跌親喇；佢傷勢頗嚴重、腳掌骨折，要坐輪椅100日，家陣都仲喺大陸養傷，需要用視像形式參加股東會。
不過，華華隔住個芒見Peter都幾精神，有小股東唔多放心，關心佢身體。Peter就先雙手合十，講聲多謝關心，話仲坐緊輪椅，已經20幾日，唔再痛喇；話晒，國家都會畀Peter「最好的醫療」。
小股東最關心嘅係，恒地早前取消十送一紅股安排，同埋恒地股價今年已跌咗近兩成，幾時先唔使「坐艇」呢？
另一位聯席主席李家誠就話，會否恢復派紅股，要視乎當年業務發展同往後數年嘅業務前景預測；希望下年股東會，家誠同家傑能夠齊齊真人出席，畀小股東一個滿意答案啦。
李華華
mailto:[email protected]