香港咁多KOL之中，蕭若元算係數一數二，雖然網民成日恥笑佢係「燈神」，但笑還笑，一樣繼續睇，點知老蕭嘅YouTube頻道入面嘅片，噚日忽然被消失或未能播放，引起網民恐慌，有人擔心老蕭係咪被滅聲、亦有人開玩笑話佢係咪燈死埋自己？好彩最後證明只係虛驚，「燈神」暫時都冇事。
蕭若元早前已移居台灣，佢一直有將《蕭氏新聞台》、《退休蕭析》等節目上載到YouTube頻道，八方噚晚8點再進入「memehongkong」的YouTube頻道，主頁同影片一欄都顯示沒有影片，至於播放清單仍有影片，但當播放時就顯示「video unavailable」，未能成功播放。
網站稱行政錯誤 修復五日
網民發現頻道入面影片被消失或未能播放，自然心驚喇，八方打電話搵到蕭生，佢話噚日下午兩點左右發現其YouTube頻道全部影片被消失，佢引述YouTube最初同佢講，話頻道遭黑客入侵，但之後YouTube又打畀佢，話只係行政錯誤，同政治事件無關，正進行緊急修復，又話修復工程需時五日，蕭生話佢都唔明點解要五日咁耐。
至於蕭生自己覺得因乜解究YouTube頻道被搞？佢就話唔估計原因，佢亦唔敢講，叫大家自己判斷，又話事件唔會影響佢拍片論政，暫時會將影片上載至facebook。
李八方