司法覆核呢條路唔易走，律師費昂貴之餘，輸咗官司仲可能要賠埋政府律師費。基督徒社工呂智恆之前為監警會越權查警暴提司法覆核，雖然敗訴，但佢會向612人道基金申請相關訟費，叫做唔使擔心訟費，但佢原來之前仲因為反對一地兩檢，不但絕食超過400小時，仲將抗爭帶上法庭申請司法覆核，𠵱家正在上訴中，預計年中開審。不過呢單司法覆核就有手尾跟，而且分分鐘要上身！
覆核一地兩檢上訴
呂智恆近日喺facebook貼文，話當日就一地兩檢提司法覆核時，原本法援係會批錢，但法援處要佢先入紙申請覆核，之後先可以正式申請法援，點知當法庭批咗司法覆核，法援先話唔批已經開始咗嘅法律費用！結果搞到佢𠵱家俾律政司追討律師費18萬元，所以公開呼籲市民捐款，仲話如果眾籌超過目標，會將錢撥作下一次覆核惡法嘅訟費預算，呂智恆仲透露除咗一地兩檢上訴案，挑戰原居民丁權上訴案，就快會開審，八方希望佢上訴成功！