台灣高雄市前日全民投票通過罷免市長韓國瑜，原本呢單嘢唔關香港人事，但亦引起網上廣泛討論，除咗羨慕台灣人可以罷免民意唔支持嘅領袖外，仲好多人講一個「都市傳說」：凡同某個人握手，政途難免有厄運，輕則仕途不穩，重則下台收場。受害人咗張曉明、王志民、新民黨，最近仲有韓國瑜。到底咁厲害邪遍中港台三地？醒目嘅讀者一定知道八方講緊係外號「777」嘅林鄭月娥。
王志民握完燉冬菇
握與不握，that's the question。中聯辦前主任王志民去年都遭逢呢個關口，佢同林鄭一齊出席誠哥慈山寺博物館啟用儀式，誠哥撮合兩人握手仔，但林鄭拒握手引來政界揣測。幾日後，王志民主動同777握手，呢一握後半年，志民就燉咗做圖書館長。去年逃犯條例風波，新民黨葉劉同777會晤握手，新民黨喺區議會選舉全敗，幾乎滅黨。
如果有如果，韓國瑜去年率團訪問香港時就唔會緊握777雙手，因為呢一握後，韓國瑜唔止輸咗總統選舉，前日仲畀高雄市民罷免，令失業人數加一位。唔知同林鄭握過手嘅政治人物會唔會都一額汗呢？有連登仔好抵死咁話，香港政府呢個落選人士俱樂部，可以安排韓國瑜做發大財局長。但畢竟握手係社交禮儀，方丈份人又小器好易得罪，八方就建議仿效董建華，直接同林鄭黎個深情擁抱，攬完唔再腳痛，82歲仲可以再出發！
李八方