英超喺6月17號回歸前再有好消息，喺上周進行嘅1,195宗武漢肺炎病毒測試入面，一單陽性個案都冇。今次係6輪檢測中第2次零確診，而喺近3輪亦只係有1人中招，真係謝天謝地。復季形勢大好，唔少球隊都開始踢吓分隊賽或者友誼賽，提升球員狀態。曼聯上周六就喺奧脫福搞咗場分隊賽，之前有傷嘅保羅普巴同拉舒福特都已經復出，仲喺分隊賽踢埋一隊，至於新加盟嘅波基斯費南迪斯就踢另外一隊，暫時未有機會同普巴合作，想知佢哋可唔可以擦出火花，就要再等多陣。
車路士同日都踢咗場分隊賽，因為跟腱斷裂唞咗13個月嘅中場羅夫度斯卓克終於復出，仲有一個入波，表現好鬼搶鏡，負責做球證嘅領隊林柏特應該都好滿意。另一支倫敦球隊阿仙奴，就喺主場同查爾頓踢咗場友誼賽，結果憑住尼基迪亞大演帽子戲法，加上拿卡錫迪、奧巴美揚同祖爾韋洛克各建一功，輕鬆以6:0大勝對手。
