全國人大會議上月底就強行推「港版國安法」，隨即引嚟西方社會嘅不滿，美英等國之後就發表聯合聲明，認為大陸嘅做法係破壞緊一國兩制，事件仲引起埋日本球星本田圭佑為香港發聲！事關有報道話日本政府拒絕參與聯合聲明譴責中國，本田隨即喺twitter轉載相關新聞，仲話唔接受日本政府無理由咁去犧牲香港民主，係球壇鮮有為港發聲甚至表態「反中」嘅球星呢！
北京硬推「港版國安法」受到西方社會關注，日本共同社周日就報稱，日本政府早前曾被問過，會唔會參加有美英等國在內嘅譴責中國聲明，但日方就表示拒絕，以免影響日中關係。現時33歲、踢緊巴甲保地花高嘅前日本國腳本田圭佑，就喺twitter分享咗呢篇報道，佢仲話：「點解日本拒絕參與批評中國嘅聲明！聽到值得犧牲香港民主都要拒絕嘅理由之前，我係點都唔能夠接受。」
少有反中球星睇齊奧斯爾
本田圭佑又同時質疑呢單新聞嘅真確性：「如果呢篇報道係真嘅，日本就真係好大鑊；但如果報道係假嘅，共同社就好大鑊喇。」事實上，目前全球體壇都正為黑人弗洛伊德被美國警察跪頸致死嘅事件發聲，但就冇幾多個球員曾經就香港問題或者中國人權問題發過聲，可能因為佢哋都怕咗中國著名嘅玻璃心，個個都唔敢好似本田圭佑咁去批評中國，怕會俾中國政府封殺。
阿仙奴中場奧斯爾上年12月喺社交媒體發表文章，公開批評中國打壓新疆維吾爾人，結果奧斯爾喺內地都變咗「敏感詞」之餘，仲連累埋球隊阿仙奴，事關央視喺事件發生後，就拒播阿仙奴嘅賽事。
郝海東「滅共」遭封殺
不過，有時中國嘅惡行就連自己人都睇唔過眼，作為中國足球隊史上入球王嘅前國腳郝海東，今年「六四」當日就喺網上大數中共嘅暴政，仲發表咗要消滅中共嘅「新中國聯邦」宣言，叫大家唔好做共產黨嘅奴隸，一夜間郝海東就變成「敏感詞」，佢原本擁有700萬用戶追蹤嘅微博賬號已被移除。
雖然今次本田圭佑主要係批評日本政府，但佢嘅立場始終都係覺得中國唔應該強推「港版國安法」，暗撐香港人。不過本田同時兼任柬埔寨國家隊主帥，以中國同柬埔寨一向親密嘅外交關係，唔知本田今次嘅勇敢，會唔會令佢烏紗不保呢？