德甲班霸拜仁慕尼黑又贏一場，最快今周就可以完成九連霸偉業！佢哋喺上禮拜六作客利華古遜，雖然開波10分鐘就俾對手艾拿利奧破網，不過拜仁三爬兩撥就靠京士利高文、哥列斯卡同基拿比嘅入波，半場反超前3:1，加上下半場射手羅拔利雲度夫斯基頂入今季第44球，打破個人單季入球紀錄，最終以4:2大破尾段有17歲小將華迪斯破蛋嘅主隊。
至於「二哥」多蒙特同日鬥哈化柏林，賽前雙方球員連同教練團都單膝下跪（下圖），英格蘭前鋒查頓辛祖熱身時仲穿上「沒有公義，沒有和平」嘅黑色T恤聲援美國被殺黑人弗洛伊德，蜜蜂兵團最終亦靠安利簡恩一箭定江山小勝對手。賽後多蒙特仍落後拜仁七分，德甲剩番四輪之下，拜仁只要喺未來兩場全勝，就有機會喺6月16日作客雲達不來梅時封王，如果多蒙特下星期輸畀杜塞爾多夫，拜仁最快仲可以喺嚟緊嘅星期六，主場擊敗慕遜加柏嘅話就提前奪冠㖭！
